Në pavijonin e Pediatrisë në Spitali Rajonal Korçë ka mbërritur në gjendje shumë të rëndë shëndetësore një foshnjë rreth 2 muajshe.
Sipas burimeve konfidenciale nga policia dhe spitali, foshnja ndodhet aktualisht në gjendje kritike, ndërsa dyshohet se përkeqësimi i saj mund të ketë ardhur si pasojë e kequshqyerjes
Bëhet me dije se foshnja ka lindur para kohe, rreth 7-muajshe. Fillimisht ajo është trajtuar në spitalin e Korçës dhe më pas në Tiranë, nga ku mësohet se ka dalë në gjendje të stabilizuar shëndetësore. Megjithatë, pas kthimit në banesë, gjendja e saj është përkeqësuar ndjeshëm.
Sipas të njëjtave burime, dyshohet se nëna nuk është kujdesur për ushqyerjen e foshnjës me gji, çka mund të ketë ndikuar në përkeqësimin e gjendjes shëndetësore të saj.
Ndërkohë, raportohet gjithashtu se nëna mund të ketë probleme të shëndetit mendor. Hetimet pritet të sqarojnë nëse ajo ka shfaqur shqetësime psikologjike pas lindjes së fëmijës.
Aktualisht, policia ndodhet në ambientet e Pediatrisë, ndërsa mjekët po bëjnë përpjekje maksimale për stabilizimin dhe shpëtimin e foshnjës 2-muajshe.
