Forcimi i lekut këtë vit i ka bërë çmimet e mallrave të importit më të lira. Kjo ecuri është konfirmuar edhe nga INSTAT i cili referoi sot se Indeksi i Çmimeve të Importit u ul me 1,5 %, në krahasim me tremujorin e dytë 2016 dhe me 0,7 %, në krahasim me tremujorin e parë 2017.
Çmimet e importit të produkteve në aktivitetet e Industrisë përpunuese kanë shënuar ulje me 1,4 %, krahasuar me të njëjtën periudhë të vitit të mëparshëm.
Ndikimin kryesor në këtë rënie e kanë dhënë çmimet e importit të produkteve në aktivitetet ”përpunimi i produkteve ushqimore” me 3,0 %, “përpunimi i koksit dhe rafineria e nënprodukteve të naftës” me 0,2 %, “prodhimi i kimikateve dhe produkteve kimike” me 1,9 %.
Krahasuar me tremujorin e dytë 2016, çmimeve e importit të produkteve në aktivitetin “nxerrja e mineraleve të tjera” kanë shënuar rritje me 0,5 %. Në tremujorin e dytë 2017, ndryshimi tremujor i indeksit është -0,7 %. Çmimet e Importit në seksionin “Industria nxjerrëse” pësuan rritje me 1,1 %, ndërsa në seksionin e “Industrisë përpunuese” pësuan rënie me 0,8 %, krahasuar me tremujorin paraardhës.
Banka e Shqipërisë në një analizë të posaçme për këtë qëllim, pohoi se presionet e përgjithshme inflacioniste në tremujorin e dytë të vitit u ngadalësuan kryesisht nga reduktimi i kontributit të inflacionit të importuar krahas zhvillimeve të përmbajtura nga ana e inflacionit të brendshëm.
Inflacioni i importuar vlerësohet të ketë dhënë një kontribut prej 0.8 pikë përqindjeje në inflacionin total të tremujorit të dytë të vitit 2017 ose 0.4 pikë përqindje më pak sesa në tremujorin e kaluar. Presionet inflacioniste me origjinë të huaj vlerësohet që ndikojnë inflacionin vendas me rreth 1-3 muaj vonesë.
Banka e Shqipërisë arsyeton se nga ana tjetër, mbiçmimi i kursit nominal efektiv të këmbimit (mesatarisht me 4.2% gjatë të njëjtës periudhë), frenoi përçimin e efekteve të çmimeve të huaja.(monitor)
a.ç
