Ministria e Mbrojtjes e Izraelit ka konfirmuar se ka ndaluar 175 vullnetarë të flotiljes “Global Sumud”.
Në një postim në X, ajo e quajti misionin detar humanitar “flota e prezervativëve” dhe deklaroi se “aktivistët, që vinin nga mbi 20 anije të flotiljes, po shoqërohen në mënyrë paqësore drejt Izraelit”. Krahas videos, shkruhet se aktivistët “po argëtohen në bordet e anijeve izraelite”, ndërsa materiali është shpërndarë nga Ministria e Jashtme izraelite.
“Një akt piraterie nga Izraeli”
Turqia ka reaguar ashpër, duke e quajtur ndërhyrjen ndaj flotiljes një “akt piraterie”. Në deklaratën e Ministrisë së Jashtme thuhet se ndërhyrja ndaj “Global Sumud”, e cila synonte të tërhiqte vëmendjen mbi krizën humanitare në Gaza, përbën shkelje të së drejtës ndërkombëtare dhe sulm ndaj vlerave humanitare.
Ankaraja ka njoftuar se ka marrë masa për mbrojtjen e qytetarëve të saj dhe u ka bërë thirrje vendeve të tjera të reagojnë në mënyrë të unifikuar.
Deklarata e Katz
Ministria e Jashtme izraelite ka argumentuar se ndërhyrja është e ligjshme, duke cituar një nen që i jep ministrit të Mbrojtjes të drejtën të sekuestrojë pasuri të lidhura me organizata të shpallura terroriste, nëse kjo konsiderohet e nevojshme për të penguar aktivitetet e tyre.
Nga ana tjetër, organizatorët e flotiljes kanë theksuar vazhdimisht se misioni i tyre është paqësor, humanitar dhe i mbrojtur nga e drejta ndërkombëtare.
38 anije arrijnë në ujërat greke
Sipas një zëdhënëseje italiane të flotiljes, Maria Elena Delia, 38 anije arritën të shmangin ndërhyrjen duke hyrë në ujërat territoriale greke, ku u tërhoqën për siguri. Ajo tha se ndërhyrja ishte e koordinuar për të frikësuar pjesëmarrësit dhe se 22 anije u ndaluan nga forcat izraelite në ujëra ndërkombëtare.
Sipas saj, anijet ushtarake izraelite iu afruan flotiljes duke kërkuar ndalimin e misionit, ndërsa më pas filloi procesi i hipjes në bord të 22 anijeve, ku ushtarët urdhëruan aktivistët të zhvendoseshin në pjesën e përparme të mjeteve.
