Vëllai i avokatit Besnik Muça, që prej disa kohësh punonte në Tiranë si avokat i lirë ka denoncuar në policinë e Durrësit zhdukjen e tij që prej mbrëmjes së 2 nëntorit.
Policia e Durrësit ka nisur hetimet për këtë rast.
Sipas burimeve nga policia e Durrësit, në sistemin TIMS rezulton se avokati Muça ka bërë check in në portin e Durrësit mbrëmjen e 2 nëntorit, por nuk dihet me saktësi ku mund të jetë zhdukur.
Autoritetet shqiptare nuk e përjashtojnë mundësinë që ai të jetë zhdukur në tragetin e linjës Durrës- Bari, ashtu siç shkruajnë mediat italiane, ndërsa shtojnë se ka mundësi që edhe të mos ketë hipur fare në traget.
Nga dëshmia e vëllait të tij, “BalkanWeb” mëson se Bujar Muça kishte dokumente të rregullta në Itali ku prej vitesh jetonte me bashkëshorten dhe fëmijët, ndërsa kohët e fundit ai kishte nisur punën si avokat i lirë në Tiranë. Për të ndarë më shumë kohë më familjen ai udhëtonte të paktën dy herë në muaj nga porti i Durrësit në Bari për të shkuar në Macerata, aty ku e priste familja.
Në bisedën e fundit që kishte bërë me vëllain, Muça nuk kishte shfaqur ndonjë shqetësim të dukshëm, thjesht e kishte informuar se do shkonte disa ditë të qëndronte pranë familjes, ashtu si edhe herët e tjera.
Sipas vëllait, avokati dyshohet të jetë nisur rreth orës 23:00 nga porti i Durrësit, ndërsa celulari i tij ka qënë i fikur që pas atij momenti.
Për zhdukjen e avokatit 54-vjeçar ka denoncuar në shtetin fqinjë edhe gruaja e tij Raimonda, por autoritetet në Durrës, thonë se ende nuk kanë marrë një shkresë zyrtare nga pala italiane. /b.d
