Kanë kaluar plot dy vjet nga tragjedia e 9 marsit të vitit 2014, kur Edlira Çopa, tashmë 39 vjeçe masakroi me thikë tre fëmijët e saj në Itali, Simonën, Kejsin dhe Sindin, të moshave 13, 10 dhe 3 vjeçe. Krimi tronditi, jo vetëm Italinë, por edhe mbarë Shqipërinë. Por dy vjet nga tragjedia, babai i vajzave, Bashkim Dobrushi, 47-vjeçar ende nuk ka gjetur paqe.
Ai është kthyer në Shqipëri dhe është vendosur në Kukës, atje ku është rritur. “Nuk i harroj kurrë ato ditë. Po përpiqem të jetoj dhe të shoh përpara”, thotë ai për mediat italiane. “Jam kthyer në Kukës, ku tre ëngjëjt e mi janë varrosur. Këtu kam shumë kujtime. Kemi parë tragjeditë e luftës në Kosovë, mbi të cilat mendoja se s’do kish tragjedi më të mëdha, por u gabova”, thotë ai. Dobrushi figuron ende i martuar me nënën vrasëse, për shkak të burokracive. I gjen rastin të falënderojë kolegët në Leçe dhe kryetarin e saj të bashkisë, të cilët sipas tij i kanë qëndruar gjithnjë pranë. I pyetur për ish-të shoqen, ai përgjigjet kështu: “Për mua ajo nuk ekziston më. Nuk mund ta fal kurrë”. Çopa është shtruar në një spital psikiatrik në Mantova ku do të qëndrojë për 10 vjet. Askush nuk ka shkuar ta vizitojë këto dy vite.
