Lideri i opozitës Lulzim Basha është ndalur në qytetin e Fierit për të prezantuar programin qeverisës të PD-së. Në takimet që ka patur me qytetarë dhe tregtarë, kryedemokrati ka premtuar se ndryshimi në ekonominë dhe xhepat e qytetarëve do të vijë nëse qeveria aktuale do të largohet.
“Çelësi i programit tonë, kyçi i ofertës së Partisë Demokratike për të nesërmen është ky: paratë që sot përfundojnë në xhepat e oligarkëve t’ia kthejmë qytetarëve përmes investimeve publike, infrastrukturë, në shëndetësi, në arsim, në kopshte, në çerdhe, në ujësjellës, në vaditje, në subvencionime për bujqësinë. Dhe nga ana tjetër të ulim taksat me qëllim që qytetarët të kenë më shumë lekë për të shpenzuar për veten e tyre dhe familjet e tyre”, tha Basha.
Një sërë qytetarësh në bisedim me kryedemokratin janë ankuar për kushtet këqija në të cilat ndodhen ekonomikisht.
“Kam kolauduar 2 herë kasën fiskale dhe më kanë vënë 600 mijë lekë gjobë për mungesë kase. Absurdi është se gjoba më është vënë nga i njëjti inspektor i cili një ditë para se të më vendoste gjobën lëshoi akt konstatimin se jam i pajisur me kasë. Më e keqja është se s’ke ku ankohesh”, tha një tregtar.
“Kemi nja dy vjet se kemi parë fare mishin me sy, tani po harrojmë bukën”-, tha një qytetar tjetër.
