Një grup prej 15 migrantësh dhe azilkërkuesish nga Amerika e Jugut, të deportuar së fundmi nga Shtetet e Bashkuara drejt Republikës Demokratike të Kongos (DRK), po përballen me presion për t’u kthyer në vendet e tyre të origjinës, pavarësisht rreziqeve serioze që thonë se i presin atje.
Sipas dëshmive të disa grave nga Kolumbia, Peruja dhe Ekuadori për agjencinë Reuters, atyre nuk u janë ofruar alternativa reale përveç rikthimit në vendet nga kanë ikur.
Një grua 29-vjeçare nga Kolumbia, e cila kërkoi të mbetet anonime për arsye sigurie, deklaroi se ndihet e detyruar të pranojë kthimin, edhe pse ka frikë për jetën e saj. Ajo kishte aplikuar për azil në SHBA pasi kishte përjetuar rrëmbim dhe tortura nga një grup i armatosur, si dhe dhunë nga ish-bashkëshorti i saj, i cili ishte oficer policie. Një gjykatës amerikan kishte vendosur më herët se ajo rrezikonte torture, nëse kthehej në Kolumbi.
Deportimi i këtij grupi drejt RDK-së është pjesë e një marrëveshjeje të diskutueshme për deportime në vende të treta, e zbatuar nga administrata e presidentit amerikan Donald Trump gjatë mandatit të tij të dytë. Kjo politikë synon të kufizojë imigracionin dhe të largojë edhe ata migrantë që ndodhen në SHBA me status të rregullt ligjor.
Një tjetër grua kolumbiane, e identifikuar si Gabriela, tha për AFP se ajo mësoi vetëm një ditë para nisjes se do të dërgohej në Kongo. Gjatë udhëtimit 27-orësh, migrantët ishin të prangosur në duar dhe këmbë. “Nuk doja të shkoja në Kongo. Kam frikë dhe nuk e njoh gjuhën,” u shpreh ajo.
Avokatë dhe aktivistë të të drejtave të njeriut kanë kritikuar këtë praktikë, duke thënë se deportimet në vende të treta përdoren si një formë presioni për t’i detyruar migrantët të heqin dorë nga kërkesat për azil dhe të kthehen në vendet e tyre, edhe kur përballen me rreziqe serioze.
Sipas tyre, dërgimi i migrantëve në vende të panjohura dhe shpesh të paqëndrueshme, si Republika Demokratike e Kongos, rrit ndjeshëm pasigurinë dhe frikën, duke i vendosur ata në një situatë të vështirë pa mbështetje dhe pa mundësi reale zgjedhjeje.
