Shefi ekzekutiv i Ryanair, Michael O’Leary, ka deklaruar se kompania dhe tregu evropian i aviacionit po përballen me pasiguri lidhur me furnizimin me karburant për avionët (kerosen).
Sipas tij, aktualisht furnizimet janë të garantuara vetëm deri në fund të muajit maj, ndërsa për muajt qershor, korrik dhe gusht nuk ka ende siguri të plotë.
Ai shton se disa kompani nafte po japin garanci vetëm deri në fund të majit dhe se situata për verën mbetet e paqartë. Pavarësisht kësaj, Ryanair nuk ka ndërmend të ulë numrin e fluturimeve, pasi rezervimet për pranverën janë të qëndrueshme dhe vetëm një rënie e lehtë vërehet për verën, që sipas tij lidhet me hezitimin e pasagjerëve për të bërë rezervime të hershme.
Në aspektin financiar, O’Leary parashikon rritje të konsiderueshme të kostove për karburant. Vetëm në muajin prill kompania ka paguar rreth 50 milionë dollarë më shumë, dhe e njëjta rritje pritet edhe në maj. Nëse çmimi i naftës qëndron në rreth 150 dollarë për fuçi gjatë një viti, kostoja shtesë mund të arrijë deri në 600 milionë dollarë.
Ai gjithashtu paralajmëron se disa aeroporte në Mbretërinë e Bashkuar mund të përballen me mungesa të karburantit nëse situata vazhdon, por vlerëson se rreziku i përgjithshëm mbetet i kufizuar.
Në lidhje me industrinë, O’Leary kritikoi pasigurinë e tregut dhe sjelljen e institucioneve evropiane, duke thënë se debatet rregullatore po dëmtojnë konkurrueshmërinë e kompanive ajrore. Ai kërkon uljen ose harmonizimin e sistemit të taksave të karbonit (ETS) për aviacionin.
Ryanair, pavarësisht pasigurive, planifikon zgjerim të mëtejshëm të flotës dhe rritje të numrit të pasagjerëve në vitet e ardhshme, duke synuar mbi 220 milionë udhëtarë në periudhën 2027–2028. /Corriere della Sera/
