Sebastian Vettel me Ferrari ka siguruar sot “pole position” në pistën e Sochi, të vlefshëm për garën e Çmimit të Madh të Rusisë, garë që do të zhvillohet nesër (starti ora 14:00).
Kjo është hera e parë këtë sezon që makina italiane jep kohën më të shpejtë në provat zyrtare dhe jo vetëm kaq. Në vendin e dytë u rendit një tjetër makinë Ferrari, ajo e Kimi Raikkonen, duke bërë që vija e parë e startit të jetë totalisht e makinës “kokëkuqe”, gjë që nuk ndodhte prej 9 vitesh në Formula 1 (që prej vitit 2008).
Dy pilotët e Ferrarit dueluan mes tyre për “pole”, me gjermanin që la pas shokun e skuadrës me vetëm 59 të mijëtat, duke treguar se makina italiane do të jetë protagoniste nesër në garë. Ferrari fitoi bindshëm betejën me Mercedes, që u rendit në vendet 3-4 me pilotët e saj, duke konfirmuar se hierarkia tashmë ka ndryshuar. Bottas zuri vendin e tretë, duke lënë pas Lewis Hamilton (i katërti), që nuk arriti të duelojë dot për “pole”.
Makina gjermane zhgënjeu në këto prova zyrtare, duke lëshuar vijën e parë të nisjes pas më shumë se 3 vitesh dominim absolur në Formula 1. Në vendin e pestë u rendit Daniel Ricciardo me Red Bull, ndërsa shoku i tij i skuadrës Max Verstappen doli i shtati. Mes tyre u “fut” braziliani Felipe Massa me Williams.
Në vendet 8-10 u renditën Hulkenberg (Renault), Perez (Force India) dhe Ocon (Force India).Nga provat sot ne SochiNë përfundim të sesionit të parë, ata që ngritën “flamurin e bardhë”, duke u eliminuar ishin Palmer (Renault), Vandoorne (McLaren), Wehrlein (Sauber), Ericsson (Sauber) dhe Grosjean (Haas), pergatiti RTK.
Ndërsa në përfundim të sesionit të dytë, u eliminuan Stroll (Williams), Kvyat (Toro Rosso), Sainz (Toro Rosso), Magnussen (Haas) dhe Alonso (McLaren). Më i shpejti, si në sesionin e parë ashtu dhe atë të dytë, ishte finlandezi i Mercedes, Valtteri Bottas. Piloti i McLaren, Vandoorne, do ta nisë nesër garën nga vendi i fundit, pasi ka bërë disa modifikime në makinë dhe është penalizuar me 15 pozicione. (b.an)
