Fëmija 4–vjeçar kalon natën në Komisariat, nga tronditja dërgohet në spital
Një 4 – vjeçar nga fshati Lekas të Pogradecit, kaloi natën në Komisariatin e Policisë pas arrestimit të të atit. Për shkak të tronditjes së pësuar përfundoi në spital.
Ngjarja ndodhi mbrëmjen e 11 Gushtit, kur policia arrestoi babain e tij, Bledi Lekën në fshatin Zvirinë, duke drejtuar një mjet të ngarkuar me dru pa leje drejtimi dhe pa dokumenta për drutë e prera. Nuk dihet në ç’rrethana prindi kishte marrë vogëlushin me vete, por arrestimi në prezencë të tij, ka shkaktuar tronditjen e të miturit.
Familja Leka banon në një fshat tri ore larg nga qendra e qytetit, pa rrugë makinash. Gruaja ishte njoftuar nga policia në mesnatë për djalin, por ajo mundi të mbërrinte aty vetëm në mëngjes. Nëna e fëmijës bën përgjegjës policët për shëndetin e fëmijës dhe ajo kërkon që ata të mbajnë përgjegjësi.
