Nga Bilal Kola
Qasja e Kryeministrit Rama në lidhje me kujtesën kolektive dhe muzealizimin ka qenë krejtë- sisht fasadë dhe aspak substanciale. Kurrikulat shkollore përgjatë këtyre 26 viteve kanë qenë dhe mbeten në gjendje skandaloze në raport me të vërtetat e pakontestueshme të krimeve dhe pasojave të komunizmit në Shqipëri. Nuk ka asnjë fjali të vetme në librat shkollorë në lidhje me shifrat reale të përndjekjes politike në Shqipëri (mbi 7,500 të ekzekutuar me ose pa gjyq, mbi 28 mijë të burgosur politikë, mbi 60 mijë të internuar dhe dëbuar).
Vendosja e një “historiani-politikan” si Paskal Milo, në krye të një grupi “ekspertësh” (që për “koincidencë” janë të gjithë të majtë) për rivlerësimin e kurrikulave është një veprim sa qesharak, po aq edhe paradoksal, kjo për faktin se personi në fjalë është shumë më tepër i interesuar për “peshkimin” e votave të enveristëve sesa për pasqyrimin objektiv të krimeve dhe pasojave të komunizmit në Shqipëri. Gjithashtu në lidhje me bunk-art(et) kuptohet qartazi sipërfaqësia dhe fasada e kësaj qeverie, pasi muzealizimit në raport me të shkuarën tragjike të mbi 1/3 së popullit tonë i jepen më shumë ngjyra artistiko-statistike, sesa fakte reale të krimit komunist dhe keqbërësve të diktaturës.
Aleanca Popullore për Drejtësi (APD) është i vetmi subjekt që ka një program serioz dhe mirëfilli në linjë me qasjen e vendeve të ish-bllokut komunist (si Gjermania, Polonia, Republika Çeke etj) në lidhje me kujtesën kolektive dhe muzealizimin. APD ka në programin e saj krijimin e muzeve te kujtesës në ish-burgjet e diktaturës komuniste (Spaç, Gjirokastër, Qafë-Bari etj.) dhe kampeve të internimit (Tepelenë, Porto Palermo, Gradisht, Savër, Plug, Grabjan etj) dhe vënia në shërbim dhe menaxhim të këtyre muzeve nga vetë anëtarët e komunitetit (duke përfshirë shoqatat) e të përndjekurve politikë.
Nisur nga eksperienca e vendeve të ish-Bllokut komunist, ne synojmë vendosjen e një standardi të ngjashëm në raport me ballafaqimin e nxënësve dhe studentëve me pasojat e krimit komunist nëpërmjet kurrikulave, si dhe me anë të ekskursioneve në vendet e vuajtjes së martirëve të lirisë dhe viktimave të komunizmit, me ciceronë ish të burgosur dhe internuar. Gjithashtu, APD synon ndërmarrjen e iniciativave për ndërtimin e Memorialit Kombëtar të Kujtesës në Tiranë, së bashku me Murin e Nderit, si dhe caktimin e Ditës Kombëtare të Kujtesës, ku shoqëria dhe shteti shqiptar në mënyre solemne të kujtojnë dhe nderojnë martirët e lirisë dhe viktimat e komunizmit.
