Pensionet në pritje të rritjes, qeveria zbulon çfarë pritet të ndodhë me pagesat për 755 mijë qytetarë

Prioritet për qeverinë vijon të jetë ‘Shqipëria sociale’, duke synuar edhe përmbushjen e Reformës së re të Pensioneve. Kështu ka thënë për INSIDE NEWS në SCAN TV, zëvendësministri i Financave Endrit Yzeiraj, ku janë 755 mijë qytetarë të cilët presin sa do të rritet pagesa mujore.

“Me aktin normativ 2026, janë shërbimet, apo shpenzimet për sisitemet e ndryshme sociale. Do vijojmë politkën mbështetesë përsa i përket pensioneve, me fonde që dalin jo vetëm nga skema e kontributeve, por edhe nga buxheti, të ardhurat që mbledhim. Deri në përfundimin e Reformë së re të Pensioneve, po vijojmë mbështetjen në fondin e përgjithshëm edhe me një pjesë nga buxheti i përgjithshëm, por do ketë edhe mbështetje në shëndetësi e arsim’’-  thotë Yzeiraj.

Prej më shumë se dy vitesh qeveria po punon me Bankën Botërore për ndërhyrjet që do të bëhen mbi skemën aktuale. Gati 32% e popullsisë së vendit është në pension. Aktualisht vlera e pensionit mesatar urban është 20 mijë e 666 lekë, ndërsa ato rurale kanë arritur në 12 mijë e 645 lekë, pas indeksimit me 2.7% në muajin korrik. Yzeiraj thekson se po përmirësohen kapacitetet administrative dhe se të ardhurat janë rritur mbi 10% krahasuar me 1 vit më parë.

“Deri tani kemi patur një rritje të ardhurash prej më shumë se 10% dhe kjo pa patur nevojë të rriten taksat, por falë një mirëadministrimi tatimor. Falë sisitemeve digjitale, është përmirësuar ndjeshëm aftësia për të gjurmuar aktivitetin ekonomik. Me përmirësimin e kapaciteteve administrative, do të rriten burimet e të ardhurave, çka nënkupton trajektore afatmesme dhe aftgajtë të zhvillimit ekonomik’’- shton Yzeiraj.

Zv.ministri Yzeiraj, thotë gjithashtu se fakti që parashikimet për rritjen ekonomike janë afatgjata dhe aktiviteti i bizneseve vijon të jetë i qëndrueshëm, do të thotë se kjo do të përkthehet në më shumë mbështetje për qytetarët.