Javanews.al ka publikuar sot një reagim të këngëtares Orgesa Zaimi, rreth mundësisë që Shqipëria të tërhiqet në të ardhmen nga pjesëmarrja në Eurovizion. Së pari ky është një qëndrim që me siguri motivohet nga emocionet dhe keqardhja që shkaktoi renditja jo e kënaqshme e Elhaida Danit në Vjenë. Së dyti, e më e rëndësishmja, ky është një vendim që varet vetëm pjesërisht nga ne si shtet, pasi pjesëmarrja në Eurovizion nuk është e siguruar në çdo edicion të tij dhe për të gjitha vendet.
Nga ana tjetër, përfaqësimi dinjitoz i këngëtares tonë në këtë Eurovizion, i vendosur përballë votave të pakta që ajo mori në momentin e votimit, rikthen në skenë sëmundjen e vjetër të këtij kompeticioni. E cila është ajo e ndarjes së tortës së fitimtarëve sipas kriteresh gjeopolitike, grupimesh etnike, fetare e kulturore të caktuara.
Eurovizioni është, për fat të keq, një Europë politike e përkthyer në nota muzikore. Këtë realitet të konsoliduar prej dekadash, duhet ta pranojmë si të tillë, së bashku me idenë se e kemi të pamundur ta ndryshojmë apo influencojmë. Sllavët votojnë sllavët, vendet e Kaukazit votojnë njëri-tjetrin, kështu bëjnë edhe skandinavët mes tyre. Gjithashtu dihet se Greqia voton Qipron, vendet balltike votojnë fqinjët majtas apo djathtas, ashtu si edhe Maqedonia voton jo rrallë Shqipërinë e vogël. Salla e Eurovizionit kthehet rregullisht, në momentin e votimit, në një ambjent kalkulimesh gjeopolitike, ku muzika është thjesht një aksesor i tepërt.
Për pasojë, të rebelohesh ndaj një tradite europiane të këngës së përzier me politikën, është diçka pa sens dhe pa ndonjë logjikë solide. Ta pranojmë që shkojmë për të marrë pjesë e jo për të fituar – ky është risku i vendeve të vogla siç jemi ne. Duket fataliste, por më shumë është realiste.
Skënder Minxhozi
