Historia e regjistruar nuk njeh një tjetër lider ballkanik – shqiptar jo se jo – që s’e ka projektuar veten as si inferior, as si i kompleksuar dhe është pranuar edhe nga të tjerët në përputhje me projeksionin e tij, si Edi Rama.
Ai ka krijuar shkëputje nga bashkë-liderët ballkanikë, por jo duke provuar të dëshmojë se është një përjashtim kualitativ, prandaj është shkëputur jo për t’u distancuar, por për ta marrë me vete Ballkanin.
Sot Ballkani Perëndimor është në qendër të Evropës, përmes figurës së Edi Ramës në qendër të liderëve evropianë.
Edhe paraqitja e sotme e tij para gazetarëve në kuadër të Procesit të Berlinit krahas Kancelarit Olaf Scholz dhe Kryetares së Komisionit Evropian, Ursula Von der Leyen, dëshmon këtë fakt të mirëqenë: Edi Rama është katapultuar në liderin e Ballkanit Perëndimor.
Dhe jo vetëm…
Është kreu i Qeverisë shqiptare, ai i cili me staturën e tij, tash e disa vite – dorën në zemër, para 7 apo 10 vitesh deri diku kolegët e tij në Evropë e Amerikë i çudiste por edhe bënte të buzëqeshnin me simpati, e shqiptarët i barrikadonte në virtualitet, kur me gardërobat e tij ekstravagante dhe atletet e bardha, marshonte në podiumet e Samiteve dhe kancelarive të perëndimit – jo (vetëm) si një perëndimor, por edhe si një politikan i cili mesazhin e studentëve shqiptarë me në krye Azem Hajdarin – e jetësonte në mënyrën më fine të mundshme.
“E duam Shqipërinë si gjithë Evropën” tingëllonte ai himn kur iu dha shkelmi regjimit komunist të Enver Hoxhës. “Shqipëria është si gjithë Evropa!”, ishte mesazhi i Edi Ramës para 7 apo 10 vitesh.
Takim pas takimi, samit pas samiti, Edi Rama është personazh i admiruar nga koleget e kolegët e tij perëndimorë.
Edhe kur e takojnë si mysafir, por edhe kur ai i pret në Tiranë.
Duan ta shohin universin e tij – nga zyra e deri tek projektet e turizmit në vend.
Fjala e tij, diskursi i debatit, targetimet dhe piketimet që ai u bën kolegeve e kolegëve të tij në Bashkimin Evropian janë tashmë legjendare.
“Pse ndjeheni e nderuar që jam në këtë panel me juve?” e pyeste Rama kolegen socialdemokrate nga Holanda para tre javësh në një panel diskutimi në Berlin.
Nuk ishte afront diplomatik kjo ndërhyrje e tij. Përkundrazi.
Ai i fliste lideres së një partie simotre për atë që ta trajtonte liderin e partisë sivëlla ashtu siç trajtojnë socialdemokratët njëri-tjetrin në Evropë.
Ka dhe një detaj tjetër nga Kongresi i Socialdemokratëve Evropianë në Berlin.
Derisa të nesërmen e asaj Konferenca shumica e krerëve të kësaj partie – shumica liderë shtetesh apo liderë opozite në Evropë – kishin marrë avionët për t’u kthyer në vendet e tyre, Kancelari gjerman kishte mbledhur partinë e tij për t’u betuar për rrugëtimin evropian të Gjermanisë nën udhëheqjen e tij.
Këtë fjalim Scholz e mbante gjermanisht.
Dhe papritmas flet për Ballkanin dhe e përkthen veten në anglisht duke thënë “i Dashur Edi… thash që Ballkanin duhet ta integrojmë në Evropë sa më shpejt”…
Ishte vetëm Edi Rama ai që mbeti i ftuari i veçantë tek socialademokratët gjermanë.
Rama nuk ngurron asnjëherë t’u thotë evropianëve që është “racizëm” ajo që bëjnë me Kosovën dhe vizat.
Edi Rama në mënyrë inteligjente ka zgjedhur shtegun e moskonfrontimit me Vuçiç-in, i cili ka humbur çdo atu politike, prejse ka filluar agresioni rus ndaj Ukrainës.
Automatikisht, dhe në mënyrë të vetëkuptueshme, podiumi evropian e sheh Edi Ramën si partnerin kyç të Brukselit e Washington-it për Ballkanin Perëndimor.
Edhe kur ky partner nuk ngurron të ngre zërin apo dridh Twitterin në përballje me Sofjen ose Londrën, Parisin apo Amsterdamin.
Zaten ky është diskursi i Ramës.
Politikanit shqiptar i cili nuk struket si kolegët e tij ballkanas dhe si politikanët shqiptarë ndër shekuj.
Edi Rama sot në Berlin sërish e dëshmoi këtë fakt.
Kur krahas Kancelarit Scholz dhe zonjës Von der Leyen u shfaq para gazetarëve dhe hapi siparin e zbritjes së Procesit të Berlinit në Tiranë, vitin që vjen.
Shqipëria është si gjithë Evropa./Albanianpost.com
