Pas kallëzimit penal të depozituar në SPAK ndaj Belind Këlliçi për çështjen e Kuvendit të Rithemelimit të Partia Demokratike në vitin 2021, mësohet se një tjetër figure e rëndësishme e PD-së ka përfunduar në Prokurorinë e Posaçme si rezultat i denoncimit të Gazment Bardhit.
Gazeta TemA bën të ditur se ndaj Flamur Nokës indicien fillestare për nisjen e hetimit e ka dhënë pikërisht Gazment Bardhi.
Kohë më parë, në një reagim të ashpër publik, Bardhi e akuzon drejtpërdrejt Flamur Nokën për shpifje lidhje me krimin, për mbrojtje interesash të errëta financiare dhe për fshehje të pasurisë nëpërmjet mosdeklarimit të një vile 760 mijë euro në Gjirin e Lalzit.
“Kujt i paskam vendosur gjobë unë, oligarkut të farmaceutikës pas emrit të të cilit Flamur Noka fsheh vilën e padeklaruar 760 mijë euroshe në Gjirin e Lalzit? … Nuk kam as vila të fshehura, as para të investuara në bizneset e oligarkëve, as licenca për ndërtim hidrocentralesh dhe, mbi të gjitha, nuk jam peng i asnjë financuesi apo krimineli, që ditën punon me Qeverinë, ndërsa natën financon flamurin e opozitarizmit të rremë.” – shkruante Bardhi në atë kohë.
Këto deklarata, të artikuluara publikisht dhe me akuza konkrete, kanë shërbyer si bazë për interesimin e SPAK, duke e futur edhe Flamur Nokën në rrethin e figurave të Partisë Demokratike që po verifikohen nga Prokuroria e Posaçme.
Ndryshe nga rasti i Këlliçit, ku kallëzimi lidhet drejtpërdrejt me aspektet organizative dhe ligjore të Kuvendit të Rithemelimit, rasti i Nokës shtrihet në akuza që prekin korrupsionin, pasurinë dhe lidhjet e mundshme me interesa kriminale, çka e bën hetimin potencialisht më të gjerë dhe më kompleks./nl/TemA
