Presidenti i Turqisë, Recep Tayyip Erdogan, ka deklaruar se Ankaraja mbetet e angazhuar për të kontribuar në arritjen e paqes globale, duke theksuar bashkëpunimin me presidentin amerikan Donald Trump për çështjet më të rëndësishme ndërkombëtare.
Duke folur pas takimit dypalësh me Trumpin, Erdogan u shpreh se të dy liderët janë të përkushtuar për të ndërmarrë hapa konkretë në drejtim të paqes.
“Unë dhe kolegët e mi po punojmë së bashku për të hedhur një hap përpara drejt paqes botërore, duke bërë gjithçka që është në fuqinë tonë. Me mikun tim të dashur, Donald Trump, theksuam rëndësinë e këtij samiti të liderëve për arritjen e paqes në Gaza”, tha Erdogan.
Presidenti turk bëri të ditur gjithashtu se gjatë bisedimeve me Trumpin do të trajtojë edhe zhvillimet më të fundit në luftën mes Rusisë dhe Ukrainës.
“Do të diskutoj edhe zhvillimet mes Rusisë dhe Ukrainës me mikun tim të nderuar dhe do të ndërmarrim hapat e nevojshëm”, deklaroi Erdogan.
Deklaratat e presidentit turk vijnë në një kohë kur përpjekjet diplomatike për armëpushim dhe zgjidhje të konflikteve në Gaza dhe Ukrainë mbeten në qendër të vëmendjes së komunitetit ndërkombëtar.
