Presidenti i Turqisë, Recep Tayyip Erdogan, i ka thënë një turme të madhe njerëzish në Stamboll se ai do të aprovonte kthimin e dënimit me vdekje nëse ai do të mbështetej nga parlamenti dhe populli.
Ai ka folur para më shumë se një milion turqve që ishin mbledhur në qytetin më të madh të Turqisë pas një thirrjeje të tij, për të treguar mbështetjen për pushtetin pas përpjekjes së dështuar për puç muajin e kaluar, transmeton Gazeta Express.
“Nëse parlamenti turk do të vendosë për dënimin me vdekje… unë iu them paraprakisht se do ta aprovoj vendimin e parlamentit”, është shprehur Erdogan.
“Thonë se s’ka dënim me vdekje në BE. Epo, SHBA’ja e ka dënimin me vdekje; e ka edhe Japonia; e ka Kina; e kanë shumica e botës.
Pra, ata lejohen ta kenë atë. Ne e kemi përdorur atë deri më 1984. Sovraniteti i përket popullit, prandaj nëse populli e merr këtë vendim, unë jam i sigurt se të gjitha partitë politike do të binden”, ka deklaruar presidenti turk. (b.an)
