Pasi u përfshi në formacionin ideal të vitit në Serinë A italiane, si mbrojtësi i djathtë më i mirë, vazhdojnë vlerësimet për Elseid Hysajn.
21-vjeçari kuqezi është përfshirë në listën e 20 talentëve më të mëdhenj të Europës, që cilësohen edhe si lojtarë me shumë perspektivë në arenën ndërkombëtare. Vlerësimi i radhës vjen as më shumë e as më pak, por nga Sky Sport, që ka renditur futbollistët më të mirë në kontinent deri në moshën 21-vjeçare. Lojtarë që kanë shkëlqyer në Kombëtaret respektive, në ligat ku militojnë por edhe në kupat e Europës. Për Hysaj-n, Sky Sport thekson se viti 2015 ka qenë mjaft pozitiv, ashtu si për disa mbrojtës të rinj në Serinë A. Pas Empolit, trajneri Sarri e ka shndërruar në një titullar të paprekshëm edhe te Napoli gjatë këtij sezoni.
Në analizë nuk harrohet të përmendet fakti se shkodrani do të luajë në Kampionatin Europian “Francë 2016″ me Shqipërinë. Elseid Hysaj është përfshirë mes 20 talentëve më të mëdhenj të kontinentit, përkrah emrave si Bernardeschi i Fiorentinës, Hakan Calhanoglu i Bayer Leverkusen, Eric Dier i Tottenham apo portieri 16-vjeçar i Milanit, Donnarumma, Ibe i Liverpool, Embolo i Basel-it dhe talenti kroat i Barcelonës, që luan i huazuar te Sporting Gijon, Alen Halilovic. Ndërkohë, mediat pranë Napolit e kanë cilësuar Elseid Hysajn si një prej katër blerjeve më të mira të skuadrës italiane për vitin 2015, duke theksuar se me paraqitjet në fushë shqiptari i ka kaluar të gjitha pritshmëritë në sezonin e parë me ekipin.
Supersport
