Vrasja e Eglantina Bucit nga i vëllai dhe i ati i saj, Shkëlzen dhe Faik Buci, duket se nuk është krimi i parë që babë e bir kanë kryer në bashkëpunim me njëri-tjetrin.
Edhe pse të akuzuar për vepra të ndryshme penale, Faik Buci, rezulton i dënuar lidhur me tentativën e vrasjes së aktorit Mishel Prela, e ndodhur tre vite më parë në kryeqytet, në afërsi të gjimnazit “Partizani”.
Në vendimin përfundimtar dhënë nga Gjykata e Shkallës së Parë Tiranë, të cilin e publikon ABC News, rezulton se Faik Buci është dënuar me 1 vit burg për veprën penale “veprime që pengojnë zbulimin e së vërtetës”, por me gjykimin e shkurtuar, dënimi iu ul në tetë muaj heqje lirie.
Sipas organit të akuzës, Faik Buci, kishte çmontuar pistoletën e përdorur në atentatin ndaj aktorit Mishel Prela, dhe e kishte vendosur mbi tavolinë. Fillimisht, ai i deklaroi policisë se armën e kishte gjetur në një çantë në oborrin e shtëpisë, por më pas rezultoi se armën e kishte marrë në çantën ku mbanin veglat e punës. Si pjesë e kësaj dosje, u dënua si autori kryesor i kësaj ngjarjeje, i biri i tij, Shkëlzen Buci. Vetëm për veprën penale “vrasje me paramendim, e mbetur në tentativë, kryer në bashkëpunim”, Shkëlzen Buci u dënua me 15 vite burg.
Me pesë vite të tjera u dënua për veprën penale “armëmbajtje pa leje” dhe në bashkimin përfundimtar të dy veprave penale u dënua me 18 vite burg, të cilat me uljen e 1/3 të dënimit kaloi në dënimin përfundimtar me 12 vite burg.
Për të kryer atentatin ndaj Mishel Prelës, Shkëlzen Buci, bashkëpunoi me një tjetër person, i cili tashmë ka marrë statusin e bashkëpunëtorit të drejtësisë pasi ndihmoi Policinë dhe Prokurorinë për zbardhjen e vrasjes së Eglantina Bucit. Për të njëjtën vepër penale atë të tentativës së vrasjes, që Shkëlzen Buci u dënua me 15 vite burg, bashkëpunëtori i tij u dënua me 4 vite, e thënë ndryshe, 11 vite më pak.
Përveç kësaj vepre penale dëshmitari u shpall fajtor edhe për “prodhimi, mbajtja, blerja apo shitja pa leje të armëve të ftohta. Për të dy këto vepra penale, ai u dënua me 4 vite burg dhe me gjykimin e shkurtuar dënimi i shkoi në 2 vite e tetë muaj.
/a.r
