Nga Ben Andoni
“Ka shumë të ngjarë që realiteti i ri që është krijuar nga bombardimet dhe luftimet, ku shteti i ashtuquajtur i Kalifatit po shkërmoqet, të sjellë dhe ndryshime të strategjisë së ISIS-it. Ata do të mund të jenë tashmë guerilë të shpërndarë në botë. Nuk dihet ende sesi do shkojë fati i tyre dhe sesi po operojnë pas grushtit të fuqishëm që po marrin ngado, porse të gjithë janë në pritje të strategjisë që ata do të përshtasin. Për momentin është herët të thuhet ndonjë gjë, pasi është një periudhë tranzitore për luftën me ISIS”, ka thënë Arjan Dyrmishi, ekspert i Sigurisë Kombëtare, për JAVAnews.
Pak ditë më parë është folur se rreziku i madh i ISIS tashmë përfshin sinqerisht Ballkanin nga ardhja e luftëtarëve të ISIS. Madje, nga një organ prestigjioz britanik, është folur edhe për Tiranën si një objekt, ku mund të goditej me shumë gjasë Ambasada Ruse. Ndërsa javë më parë, Shërbimet Inteligjente vendase dhe të huaja eliminuan një akt terrorist ndaj përfaqësueses së Izraelit në futboll.
Joby Flarrick, që mori Pulitzer me një libër kushtuar ISIS, mëton se grupi militant Shteti Islamik, në formën që ka aktualisht, është rezultat i transformimit të një kryengritjeje të gjatë sunite, e cila ndjek si logjikë pushtimin amerikan të Irakut në vitin 2003.
Dhe, për publikun ai ka dhënë një kuriozitet se: Shteti Islamik nuk daton nga viti 2014, kur ka nisur të pushtojë territore, porse farat e tij janë mbjellë më shumë se një dekadë më parë. Autori mendon se përparësia e këtij shteti lidhet me gabimet që janë bërë kur SHBA ka ndërhyrë në Irak, “e papërgatitur për të menaxhuar një vend dhe e papërgatitur për të trajtuar konflikte etnike”.
Publiku shqiptar është i interesuar për çështjen lidhur me ISIS-in pasi pak ditë më parë, Ministri i Brendshëm i Kosovës përgënjeshtroi faktin se Lavdrim Muhaxhiri, një eksponent i lartë i ISIS-it me origjinë nga Kaçaniku dhe dhjetëra kosovarë janë rikthyer nga Siria në Kosovë via Maqedonia.
“Nuk e besoj të jetë lajmi i vërtetë për arsyen e vetme se në vendet shqiptare publiku është shumë kurioz dhe nuk do të kalonte pa u marrë vesh një ardhje kaq masive e këtyre njerëzve, porse rreziku që një pjesë të ketë ardhur është krejt eminent”, thotë Dyrmishi.
Shqipëria, por më shumë Kosova dhe Maqedonia, kanë shumë individë që gjenden të përfshirë në këtë luftë. Paçka se numri ekzakt nuk dihet, për një gjë duhet të jemi të sigurt se prania e shqiptarëve jo vetëm është e konfirmuar por i ashtuquajturi shteti islamik në organet e veta mediatike transmetoi edhe në shqip për shumë kohë.
Periudha gjatë të cilës shteti i ashtuquajtur i Kalifatit, po përmbyset, duket një periudhë që ende është e panjohur për specialistët, që u duhen të dhëna shtesa për të gjykuar. “Problemi më i madh i tyre është se tani mund ta shpërndajnë rrezikun, ngaqë do shërbejnë me disa vatra, por që kuptohet se pesha specifike e qendrës së tyre do të bjerë me kalimin e kohës, për shkak se tani s’kanë më një qendër nga ku mund të drejtojnë propagandën e tyre”, citohet specialisti për Javanews.
Pak kohë më parë, e përditshmja franceze Le Monde, bazuar në një raport publik nga Organizata e Kombeve të Bashkuara shkroi se janë rreth 150 shqiptarë që luftojnë nën flamurin e zi të shtetit Islamik. Ndërkohë që Kosova ka rreth 230 luftëtarë të numëruar. Shqipëria renditet e nënta mes 26 vendeve nga të cilët janë rekrutuar luftëtarët. Paradoksi është se në këtë raport Shqipëria ka bërë hapa më lart krahasuar edhe me vende myslimane si Maroku, Turqia apo Kuvajti.
Sot, pranohet se në Ballkan, Kosova, Bosnja e Hercegovina dhe Shqipëria ishin tre ndër vendet furnizuese me luftëtarë mes 10 vendeve që kanë më shumë shtetas në Siri dhe Irak në raport me popullsinë. Numri më i madh i luftëtarëve të ISIS-it vjen prej Azisë Qendrore dhe Rusisë dhe madje thuhet se rusishtja është gjuha më e folur nga militantët, pas arabishtes. Flarrik besonte se janë rreth 20.000 luftëtarë aktivë të ISIS, porse shifrat tashmë duhen marrë me rezervë nga goditjet e pamëshira që po marrin nga bombardimet e disa fuqive. (JAVAnews)
