Ministri i Bujqësisë, Zhvillimit Rural dhe Administrimit të Ujërave, Edmond Panariti i ka bërë thirrje prodhuesve shqiptarë që të rrisin ofertën e prodhimeve bujqësore.
“Unë dua të jem konkret, e gjithë kjo eksperiencë e dy viteve të para të qeverisjes, na ka mësuar se duhet të rrisim ndjeshëm ofertën e prodhimeve tona bujqësore dhe nisur edhe nga fakti që Shqipëria disponon sipërfaqe të kufizuar të tokës bujqësore, e vetmja mundësi që kemi është një shfrytëzim maksimal i tokës bujqësore, por ky shfrytëzim nuk mund të bëhet vetëm më një shfrytëzim konvencional të tokës bujqësore, por duhet të bëhet nëpërmjet teknologjive, nëpërmjet serave, prandaj duhet të rrisim ndjeshëm sipërfaqen me sera. Ne kemi 1000 e diçka më tepër hektarë tokë sera , sfida jonë është që në dy vitet e ardhshme ta shtojmë në 3000 ha tokë sera”, tha Panariti gjatë konferencës “Mbështesim risitë në agrobiznes. Serat, një potencial i madh për t’u eksploruar”, një aktivitet që organizohej nga Ministria e Bujqësisë dhe ku merrte pjesë gjithashtu Zëvendëskryeministri Niko Peleshi dhe ambasadori i Italisë në vendin tonë, Massimo Gaiani.
