Politikanët e pasur të Kosovës, e kanë një të përbashkët me popullin e varfër, marrjen e kredive. Dallimi me popullin është në të ardhurat vjetore, të cilat i kanë shumëfish më të larta, e po ashtu dhe paratë që i kanë në banka.
Sipas deklarimit të pasurisë në Agjencinë Anti-Korrupsion, shumica e deputetëve të cilët janë të pasur kanë shuma të mëdha të parave në banka, rroga të majme, e miliona pasuri të paluajtshme, kanë deklaruar se kanë dhe kredi, për rinovim të shtëpisë, apo për martesë të fëmijëve.
Kredisë përveç qytetarëve, të cilët janë detyruar t’i marrin duke pasur parasysh gjendjen financiare, nuk i ka shpëtuar as presidenti i vendit Hashim Thaçi, i cili ka deklaruar para në bankat e Kosovës në vlerë prej mbi 300 mijë euro dhe të ardhura vjetore mbi 58 mijë euro, por ka dhe kredi 25 mijë e 406.15 euro.
Edhe deputeti i VV-së Faton Topalli, vazhdoj t’i prijë listës si deputeti më të ardhura më të larta vjetore, pasi që ai së bashku me bashkëshorten e tij, kanë deklaruar të hyra vjetore prej 146 mijë e 144 euro, nga pagat e marra në Zvicër dhe në Kosovë, ndërkaq para të gatshme të mbajtura në institucione financiare ka në vlerë prej 41 mijë e 350 euro.
Me gjithë shumat e mëdha të të ardhurave, as Faton Topalli, nuk i ka shpëtuar kredisë, pasi që ka deklaruar kredi rreth 500 mijë euro. Edhe deputeti i PDK-së Adem Grabovci i cili ka mbi 31 mijë euro të ardhura vjetore së bashku me bashkëshorten e tij, ka kredi në vlerë prej 15 mijë euro.E pa kredi nuk është as shefi i GP të PDK-së Zenun Pajaziti i cili së bashku me bashkëshorten e tij ka të ardhura vjetore në vlerë prej 50 mijë euro, por e ka dhe kredinë për ndërtimin e shtëpisë në vlerë prej 50 mijë euro.
Kredi ka edhe deputeti i AAK-së Pal Lekaj, i cili ka të ardhura vjetore në vlerë prej 23 mijë euro dhe pasuri të paluajtshme në vlera të mëdha, dhe kredi prej 75 mijë euro. Në kredi është edhe kryetari i VV-së Visar Ymeri i cili ka para të gatshme në institucionet financiare prej 52 mijë e 273 euro, e të ardhura vjetore rreth 28 mijë euro, ka kredi prej 18 mijë euro.
I zhytur deri në fyt në kredi është edhe ministri i Arsimit, Arsim Bajrami, i cili edhe pse ka rreth 200 mijë euro para të gatshme në banka, e të ardhura vjetore prej rreth 30 mijë euro e ka një kredi rreth 150 mijë euro.
Duke parë pasurinë që e posedojnë, të ardhurat e tyre, e paratë e kursyera nëpër banka, duket mjaft e çuditshme hyrja e këtyre politikanëve në kredi, përgatiti Blic. (b.an)
