Shqipëria po konfirmon një rritje të qëndrueshme të lëvizshmërisë së shtetasve edhe gjatë muajve të parë të vitit 2026. Sipas të dhënave më të fundit të INSTAT, gjatë muajit shkurt mbi 1.1 milionë persona, shqiptarë dhe të huaj, kanë hyrë në territorin e vendit, duke shënuar një rritje prej rreth 3.9% krahasuar me të njëjtën periudhë të një viti më parë.
Protagonistët kryesorë të kësaj lëvizjeje mbeten shtetasit shqiptarë. Me mbi 584 mijë hyrje, ata kanë shënuar një rritje prej 7.6%. Nga ana tjetër, fluksi i të huajve paraqitet më i stabilizuar. Ndonëse shifra prej rreth 516 mijë vizitorësh mbetet e lartë për një muaj dimëror, rritja krahasuar me vitin 2025 është thuajse e papërfillshme, në nivelin 0.03%.
Sa i përket origjinës së vizitorëve, Europa mbetet “busulla” kryesore. Sipas INSTAT, Europa Jugore vazhdon të mbajë peshën kryesore me 85% të totalit të hyrjeve nga kontinenti, e ndjekur nga Europa Perëndimore me 5%.
Kjo shifër konfirmon se vizitorët nga vendet fqinje dhe rajoni si Kosova, Italia, Greqia, Maqedonia e Veriut dhe Mali i Zi mbeten motori kryesor i lëvizjes në këtë periudhë të vitit.
Qëllimi i hyrjes në territorin shqiptar i shtetasve të huaj, në 96% të rasteve është për qëllime personale. Ndërsa hyrjet e shtetasve të huaj për qëllime biznesi dhe profesionale janë rritur me 7,9%.
