Kjo është një nga historitë më të lexuara të këtyre ditëve, jo vetëm në mediat e mëdha botërore. Një gjyqtare amerikane duhet të japë vendimin për një të dyshuar për vjedhje.
Ajo zbulon se personi që kishte përpara ishte një shok i shkollës së mesme, një djalosh i shkëlqyer, që kishte përfunduar në rrugën e krimit.
Ai shpërthen në lot dhe videoja e këtij momenti ka prekur shumë njerëz.
Por kush është Arthur Booth?
Si shumë adoleshentë, edhe ai ëndërronte një karrierë të suksesshme.Ai ishte i shkëlqyer në matematikë dhe shkencë dhe shpesh u thoshte familjes dhe miqve se donte të bëhej neuro-kirurg.
Por edhe Mindy Glazer kishte ëndrrat e saj në shkollën e mesme Nautilius në Majemi. Ajo fillimisht donte të bëhej veterinere, por më vonë vendosi të shkonte për juridik dhe u bë gjyqtare.
Të dy shokët e klasës u përballën në sallën e gjyqit. Por për Booth historia ishte krejt ndryshe.
Sipas familjes, 49-vjeçari e ka kaluar shumicën e jetës si adult pas hekurave të burgut.Fillimisht ai krijoi varësi ndaj kokainës dhe bixhozit. Kjo bëri që të bënte krime të vogla për të siguruar para cash.
Pasi krijoi varësinë, ai e la edhe shkollën. Këtu nisi kalvari i vuajtjeve. “Po të mos ishte varësia ndaj drogës dhe bixhozit, ai nuk do ishte këtu. Ai nuk është i dhunshëm dhe nuk ka lënduar askënd. Por për të ushqyer varësitë e tij, i duhet të vjedhë para,” tha një kushërira e tij.
“Ai ka qenë arkitekti i rrënimit të tij. Tani familja shpreson se pasi u turpërua në sy të shoqes së klasës, kjo do i shërbejë si zile zgjimi. Shpresojmë të nisë një jetë të re,” tha Melissa Miller për Daily Mail.
Por çfarë ndodhi atë ditë në gjykatë?
Gjyqtarja Glazer e pyeti:
“Mr. Booth, kam një pyetje për ju”.
“Po zonjë”.
“Mos keni shkuar në Nautilus në shkollën e mesme”.
Duke parë nga gjyqtarja, Booth thotë: “Oh Zot i madh”!
“Më vjen keq të të shoh këtu. Gjithmonë kam pyetur veten se çfarë ndodhi me ty,” i tha ajo.
“Ky ishte djaloshi më i këndshëm në shkollën time. Ai ishte më i miri në shkollë të mesme. Kam luajtur futboll me të dhe shih çfarë ka ndodhur. Më vjen keq,” i tha ajo
