Partia Demokratike ka reaguar pas serisë së ngjarjeve të rënda që tronditën vendin këtë të martë, më 28 tetor 2025, duke e cilësuar ditën si një “të martë të zezë” për Shqipërinë.
Në harkun kohor të vetëm pak orëve, tre persona mbetën të vrarë me thikë në Durrës, Tiranë dhe Berat, ndërsa në Shkodër një tjetër u plagos nga shpërthimi i një sasie tritoli. Në një deklaratë zyrtare për mediat, PD akuzon qeverinë dhe kryeministrin Rama për humbjen e kontrollit mbi rendin publik dhe për krijimin e një klime të frikës dhe pasigurisë në çdo cep të vendit.
“Dita e sotme është kthyer në një të ‘martë të zezë’ për Shqipërinë. Tri vrasje me thikë, në Durrës, Tiranë dhe Berat, dhe një i plagosur me tritol në qytetin e Shkodrës, flasin për gjendjen e terrorit ku është zhytur vendi dhe humbjen e kontrollit nga një qeveri që qeveris me Diellën dhe ‘Kryeministrin diell’. Partia Demokratike duke dënuar me forcë çdo akt dhune ngushëllon familjet e viktimave dhe bën thirrje që drejtësia të veprojë me baraspeshë dhe ftohtësi për të shmangur çdo vetëgjyqësi.
Në të njëjtën kohë ne ngrejmë alarmin për rolin e spektatorit në raport me rendin e sigurinë ku e ka lëshuar veten Policia e narkoshtetit, duke treguar jo vetëm paaftësi, por edhe pandjeshmëri ndaj qytetarëve dhe rendit publik. Dhuna nuk është zgjidhja, dhe aq më pak është zgjidhja një Polici dhe qeveri që nuk ka prioritet jetën dhe sigurinë e shqiptarëve, por ndarjen e drogës, territoreve dhe ndikimit elektoral me bandat.
Në shtetin e Ramaduros, ka vetëm terror, frikë dhe vrasje.”, thuhet në reagimin zyrtar të selisë blu.
Ngjarjet e ditës: tre vrasje në pak orë
Dita e martë rezultoi dramatike për Shqipërinë, me tre vrasje brenda disa orësh. Në Durrës, një 25-vjeçar me probleme të shëndetit mendor vrau të atin pas një konflikti në banesë.
Në Tiranë, një debat mes dy kolegëve në një lokal në zonën e Komunës së Parisit përfundoi tragjikisht, pasi 41-vjeçari që punonte si picier goditi për vdekje me thikë kuzhinierin 34-vjeçar.
Në Berat, një konflikt absurd për një kalë u kthye në përplasje fatale, ku një 42-vjeçar nga Tirana humbi jetën, ndërsa autori, një 63-vjeçar me precedentë penalë në Greqi, është ende në kërkim.
Ndërkohë, në Shkodër, një shpërthim tritoli plagosi një person. Hetimet për të gjitha ngjarjet vijojnë nga policia dhe prokuroria.
