Policia ka arritur të gjurmojë kompjuterin nga është nisur e-maili kërcënues për ministrin Saimir Tahiri, çka ka sjellë edhe ndalimin e dy të rinjve nga Kashari, Klodian Mahmutaj e Valter Veshi, por këta kanë thënë se ishte vetëm një shaka.
Pas arrestimit, dy personave u është sekuestruar një kompjuter portativ si dhe dy telefona celularë.
Megjithatë, pas hetimeve, ka rezultuar se të rinjtë nuk kanë asnjë lidhje me aktivitete terroriste. Për këtë arsye, ata do të ndiqen në gjendje të lirë. Sipas hetuesve, shtetasi Klodian Mahmutaj ka thënë se kishte hapur një adresë e-maili, të cilën kohët e fundit e ka përdorur shtetasi Valter Veshi, i cili i kishte ndryshuar edhe fjalëkalimin e hyrjes në gmail.
“Nuk e di çfarë ka bërë, pasi nuk hyj dot më në atë adresë, por çfarëdo të ketë dërguar, ka qenë shaka”, mësohet të ketë thënë pronari i adresës së e-mailit, shkruan gazeta Dita.
Emaili u dërgua një ditë pas sulmeve në Paris, çka krijoi jo pak panik.
