Mëngjesi i kësaj të shtune ka nisur me një bilanc tragjik përsa i përket aksidenteve rrugore.
Një aksident me vdekje është shënuar orët e para të mëngjesit të kësaj të shtune në lagjen nr.17 të Durrësit, në rrugën “Vllazërimi”.
Sipas asaj që njoftojnë uniformat blu, 22-vjeçari me iniciale D.H. ka humbur kontrollin mbi drejtimin e automjetit duke u përplasur me një trajler të parkuar.
Si pasojë e aksidentit, shoferi 22-vjeçar ka humbur jetën në vendin e ngjarjes. Grupi hetimor po punon për sqarimin e plote te rrethanave të aksidentit.
Ndërkohë një tjetër aksident me pasojë vdekjen ka ndodhur në vend. Policia njofton se në aksin rrugor Librazhd-Prrenjas, automjeti me drejtues 31-vjeçarin me iniciale E.M. është përplasur me kamionin me drejtues 30-vjeçarin me iniciale Y.Z.
Si pasojë e aksidentit ka humbur jetën në vendngjarje 31-vjeçari, dhe është dëmtuar pasagjeri që udhëtonte me të, i cili është në kujdesin e mjekëve. Drejtuesi i kamionit është shoqëruar në polici për kryerjen e veprimeve procedurale.
