Ministri për Europën dhe Punët e Jashtme, Igli Hasani shprehet thellësisht i tronditur lidhur me ngjarjen e rëndë në Magdeburg të Gjermanisë.
Në një postim në “X”, Hasani e cilëson atë një sulm mizor teksa shton se zemrat tona janë pranë familjeve të viktimave dhe popullit gjerman.
Ndër të tjera Ministria e Jashtme bën të ditur se sipas informacioneve paraprake deri më tani nuk ka shtetas shqiptarë të lënduar nga ky sulm.
“Thellësisht të tronditur nga lajmi për sulmin mizor në Magdeburg, i cili ka lënë dhjetëra familje të shkatërruara gjatë një periudhe që duhej të ishte e gëzueshme. Zemrat tona janë pranë viktimave, familjeve të tyre dhe popullit gjerman gjatë kësaj kohe të vështirë”, shkruan ministri Hasani.
Ngjarja e rëndë ka ndodhur në një treg Krishtlindjesh në qytetin e Gjermanisë, Magdeburg ku një makinë ka marrë para një turmë njerëzish duke shkaktuar sipas mediave 11 viktima dhe 68 të plagosur, mes të cilëve 15 në gjendje të rëndë shëndetësore..
