Ferdinand Saraçi dhe Teuta Gjinollari janë bindur të zbresin nga vinçi pas 2 orësh. Mësohet se kërkesës së tyre për t’u takuar me Erion Veliajn dhe ministren Lindita Nikolla i janë përgjigjur institucionet respektive.
Krahas policisë dhe zjarrfikësve, në vendngjarje kanë qenë të pranishëm një këshilltare e MAS dhe një zyrtar i Bashkisë Tiranë.
Ndërkohë, mediat raportuan më herët se çifti ka probleme ekonomike dhe janë ish të përndjekur politikë. Disa ditë më parë ata denoncuan në media gjendjen e tyre dhe pamundësinë për të rritur fëmijët.
***
Dy persona, të identifikuar si Ferdinand Saraçi dhe Teuta Gjinollari, burrë e grua, janë ngjitur majë vinçit mëngjesin e sotëm tek Pallati i Kulturës duke kërcënuar për vetëvrasje.
Çifti ka kërkuar praninë e Kryebashkiakut Erjon Veliaj dhe të Ministres Lindita Nikolla, si i vetmi kusht për të zbritur në tokë.
Nuk dihen ende motivet që i kanë çuar drejtë këtij veprimi, ndërsa policia është në vendngjarje në përpjekje për të negociuar me çiftin.
Nuk është hera e parë që njerëz kërcënojnë të hidhen nga lartësitë, vetëm dy ditë më parë 35 vjeçari i identifikuar si Sajmir Zalli kërcënoi vetëvrasje nga i njëjti vinç.
Zalli zbriti pas gati 60 minutash nga vinçi, ndërsa rrëfeu se motivi që e çoi drejt këtij veprimi ishte fakti se ish-bashkëshortja nuk e linte të takonte fëmijët.
***
Ferdinand Saraçi dhe Teuta Gjinollari, burrë e grua, të cilët mëngjesin e sotëm janë ngjitur mbi vinç duke kërcënuar vetëvrasje, mësohet se janë ish të përndjekur politik.
Ndonëse ende ata nuk kanë deklaruar arsyen se përse janë ngjitur mbi vinç, në një intervistë dhënën pak ditë më parë në Report Tv, Teuta Gjinollari ka deklaruar se kërkon lekët e dëmshpërblimit dhe një punë, ose në të kundërt do të rrezikonte edhe vetëflijimin.
Por, me sa duket, apeli i tyre nuk është dëgjuar, duke sjellë edhe veprimin e sotëm.
/b.d
