Vazhdimi i dialogut midis Beogradit e Prishtinës në Bruksel pritet të vazhdojë pas inaugurimit të presidentit të ri të Serbisë, përkatësisht kthimit në Kosovë të Ramush Haradinajt pas përfundimit të rastit gjyqësor që po zhvillohet ndaj tij në Francë në bazë të një kërkese të Serbisë. Kështu vlerësojnë burime diplomatike të përfshira në dialogun e Brukselit, citon Danas i Beogradit, transmeton Koha.net. Siç vlerësohet, kthimi i Haradinajt në Kosovë do të duhej të përputhej me zgjedhjen e presidentit të ri të Serbisë. Në ndërkohë, sipas burimeve të “Danasit”, do të duhej të përfundonte draftimi i aktit të themelimit të Asociacionit të Komunave Serbe.
Por problem shfaqet kundërshtimi i Serbisë që AKS-ja të themelohet sipas vendimit të Gjykatës Kushtetuese të Kosovës, ndërsa Qeveria e Kosovës është e vendosur që ta respektojë atë vendim. Nga ana tjetër Prishtina kërkon nga Serbia të respektojë pavarësinë e sistemit energjetik të Kosovës.
Nëse rreth këtyre çështjeve merren vesh mes vete Beogradi e Prishtina, gjithnjë sipas “Danasit”, në tavolinë mund të gjenden edhe tema më të mëdha. Gjithnjë e më zëshëm paralajmërohet marrëveshja ndërshtetërore mbi normalizimin e raporteve, por ende s’dihet kur do të ndodhë kjo.
Pala kosovare insiston që ky nënshkrim të ndodhë sa më parë, ndërsa ajo serbe kërkon që nënshkrimi i një marrëveshjeje të tillë të bëhet në fund të negociatave për hyrje në BE. “Danas” citon burime se kjo marrëveshje do të jetë “Më pak se njohje e më shumë se normalizim”.
Nga Prishtina arrijnë njoftime sipas të cilave autoritetet e atjeshme do të nisin themelimin e Forcave të Armatosura të Kosovës menjëherë pas përfundimit të procesit zgjedhor në Serbi, meqë pohohet se ka marrë sinjale të fuqishme t’i hyjë këtij procesi posa të zgjidhet presidenti i ri i Serbisë. Pritet që Ushtria e Kosovës të themelohet deri në vjeshtë me pëlqimin e edhe të komunitetit serb. “Danas” rikujton kthimin e Listës Serbe në Kuvend.
Dushan Janjiq citohet të ketë thënë se vazhdimi i negociatave pritet nga fundi i prillit ose në fillim të majit, transmeton Koha.net. (b.an)
