Në intervistën e djeshme në Top Story, kandidati i PD-së për Bashkinë e Tiranës, Halim Kosova, justifikoi kryetarin aktual të Bashkisë, Lulzim Basha, për dhënien e lejes së ndërtimit vetes së tij për një kat shtesë në pallatin ku jeton, duke deklaruar se edhe ai, si gjithë të tjerët, ka zgjidhur problemet e veta. Fillimisht, Kosova u përpoq t’i shmangej pyetjes së drejtuesit të emisionit për lejen e Bashës, duke thënë se nuk ka dijeni për këtë çështje dhe nuk e ka dëgjuar.
“Nuk kam dijeni për këtë, pse të gënjej kot. Nga fushata erdha këtu direkt. Sa u ndërrova në shtëpi 5 minuta. As të komunikoj nuk kisha mundësi me stafin, për të qenë korrekt, për të ardhur në kohë këtu. Megjithatë këtë s’e kam dëgjuar”, tha Kosova.
Por, pavarësisht se kjo çështje ka disa ditë që zien në të gjitha mediat, ai u përpoq t’i shmangej përgjigjes. “Për çdo gjë ka një ligj. Brenda këtij ligji, çdo qytetar nga i pari tek i fundit, është e mira që të gjitha nevojat e veta t’i zgjidhë brenda këtij kuadri ligjor. Nëse zoti Basha është kryetar bashkie apo një tjetër është shef në një fabrikë buke, gjithsekush do të zgjidhë problemet e veta, edhe ai që bën bukën do hajë bukë, edhe ai që është kuzhinier do hajë ushqim, edhe ky që është kryetar bashkie do të zgjidhë problemet e veta. E rëndësishme për mua është brenda kuadrit ligjor dhe të mos përfitohet nga pozicione të caktuara që ka njëri apo tjetri. Nëse çdo nevojë e çdo qytetari, çfarëdolloj pozicioni të ketë ai, zgjidhet brenda kuadrit ligjor, kjo është normale”, deklaroi Kosova.
Më pas, i pyetur për akuzën për ndërtimin e kateve pa leje në klinikën e tij, Halim Kosova rrëfeu “marifetin” se si të mund të ndërtohet pa leje dhe më pas të legalizohet. Në intervistën e tij, Kosova thotë se duke parë të tjerët që ndërtonin, e ka nisur edhe vetë këtë çështje.
“Çdo tarracë, edhe po të shohësh, një ka depo uji, një ka kondicionerin, një ka tendë, unë bëra një kështu si prej dërrase, si strehë. E cila me kalimin e kohës kërkoi investime më të shumta, por thjesht dërrasë po ta them, që në një moment të caktuar erdhi një miku im, dërrasë – dërrasë, tendë – tendë, ky është ndërtim dhe duhet ligjëruar. Në vendin tonë ka dy ligje, urbanistike dhe i legalizimit. Ka 6-7 vjet madje. Kam prit radhën si të gjithë qytetarët e tjerë që këto prej dërrase sipër klinikës ta legalizoj. Nëse unë do ta fsheh, nëse unë nuk jam transparent që kjo kasolle sipër klinikës nuk legalizohet ose e mbaj të fshehur, ky është gabim. Kur unë e deklaroj ore kam bërë këtë. Më takon, mirë, s’më takon e heq. Kjo nuk ka ndonjë gjë të keqe mendoj”, tha Kosova.
Pra, sipas Kosovës, kushdo që kërkon të ndërtojë pa leje, fillimisht ngre një strukturë prej dërrase, e legalizon dhe më pas e kthen në pallat 5 katësh.
TEMA*
