Emisioni ‘Java në RTSH’ solli detaje të reja mbi dosjen e Klement Balilit.
Arresti me vetëdorëzim apo falë presionit të policisë i personazhit më të kërkuar në Shqipëri është duartrokitur nga të gjithë. “Në fatkeqësinë e tij personale ku ka rënë, në bastin e egër me drejtësinë, mbas kuriozitetit të pare për të, tashmë Balili prodhon vetëm psherëtima: lehtësimi për ata që e donin në pranga dhe ankthi për shumë të tjerë, që në rrethana, kohë dhe vende të ndryshme kanë pasur lidhje me të” – kështu u shpreh në editorialin e tij analisti Lorenc Vangjeli.
Ai tha se kokaina dhe jo cannabisi kanë bërë me dhembje koke ata që e përmendnin emrin e këtij personazhi që këtë javë, është shndërruar në yll televiziv.
Ndërkohë, gazetari investigativ, Artan Hoxha, tregoi sesi i shpalluri në kërkim prej dy vitesh arriti t’i shpëtonte operacioneve policore.
Sipas Hoxhës, Klement Balili nuk kishte armiq natyralë. Ai mbante një kapele dhe nuk përdorte celular, pikërisht për t’iu shmangur gjurmimit. Hoxha solli një detaj interesant teksa u shpreh se Balili është rrezikuar vetëm një herë nga policia, por ishte kjo e fundit që nuk e ka identifikuar.
“Gjatë një operacioni që nuk kishte lidhje me kërkimin e tij, Klement Balili ka qenë pranë rrezes së policisë. Por, policia e ka larguar atë dhe shumë të tjerë nga vendi i ngjarjes” – tha Hoxha.
Ai u shpreh se nuk dihen ende provat që mund të ketë DEA për Klement Balilin. Ndërsa sipas analistit Preç Zogaj, ky është një rast i veçantë sepse kurrë nuk ka pasur ngulmim kaq të madh nga SHBA-të për një të dyshuar për trafikim kanabisi.
Sipas analistit Lorenc Vangjeli, amerikanët këmbëngulën pasi Balili kishte lidhje me politikën. Vangjeli tha se ka dyshime që nuk bëhet fjalë vetëm për kanabis.
Ndërkohë Artan Hoxha solli detaje edhe nga qëëndrimi i Balilit në burg.
“I është rezervuar një trajtim i veçantë në Burgun 302. Qëndron në një qeli vetëm dhe i janë lejuar pajisjet elektro-shtëpiake. Të qëndruarit e këtij personi në paraburgim është një lloj mesazhi për ata që janë jashtë. Përmes intervistës ai përçoi disa mesazhe të koduara. Qëndroi i heshtur dhe nuk do të flasë për ato që mund të dijë. Por etiketimi si ‘Eskobar’ nuk shkon me akuzat që rëndojnë mbi të” – tha Hoxha në emisionin Java.
Ndërkohë që analisti Lorenc Vangjeli ironizoi duke u shprehur se: Herët a vonë, të gjithë do të shkojnë atje…
