Ministria e Jashtme e Maqedonisë e konfirmoi autenticitetin e dokumentit të publikuar nga mediat maqedonase para tre ditësh, përmes të cilit MPJ-ja e kishte njoftuar Ambasadën e Kosovës se mes personave të arrestuar nga Policia gjenden edhe Mirsad Ndrecaj dhe Beg Rizaj, të cilët më vonë rezultuan të vdekur.
“Ajo ishte listë preliminare, e të gjithëve në identifikim, dhe ne si Ministri e Jashtme e kemi marrë për përdorim të mëtutjeshëm. Atë e përcollëm edhe deri tek Ambasada e Kosovës në Shkup”, thuhet në përgjigjen e zëdhënësit të Ministrisë së jashtme të Maqedonisë.
Në këtë listë nuk figurojnë emrat e tetë personave të tjerë që humbën jetën gjatë aksionit, por qëndrojnë të Mirsad Ndrecajt dhe Beg Rizaqjt.
Ambasadori i Kosovës në Shkup Ylber Hysaj, nga ana tjetër vazhdon të hesht dhe të mos bashkëpunojë me mediat për të zbardhur të vërtetën e plotë rreth dokumentit të adresuar për të nga institucionet e Shkupit.
Dokumenti i Ministrisë së Jashtme drejtuar Ambasadës së Kosovës ku thuhet se Komnadant NATO dhe Komandant Begu janë të arrestuar, mban datën 12 maj, ndërsa vetëm një ditë më vonë, Ministria e Brendshme përmes një komunikate zyrtare për mediat i shpalli të vrarë të dy kosovarët.
Zbardhja e të vërtetës për rastin e Kumanovës mund të bëhet vetëm me hapjen e një hetimi mbi ngjarjet e 9 dhe 10 majit. Deri tani zyrtarisht një gjë të tillë nuk e ka kërkuar askush. Hetim të ri mund të kërkojnë autoritet e Kosovës, por edhe ato të vendit, të cilët deri tani nuk kanë treguar gatishmëri për një gjë të tillë.
