Banka Botërore ka publikuar raportin e saj të përvitshëm “Të Bësh Biznes (Doing Business) dhe për vitin 2016, Shqipëria është ngritur me 32 vende në krahasim me vitin e kaluar, duke u renditur në vendin e 58 nga 190 vende që janë në këtë listë.
Ministrja e Ekonomisë Milva Ekonomi, tha se vlerësimi për këtë vit është më i miri në historinë e Shqipërisë që nga viti 2003. Ekonomi thekson se 3 janë reformat që kanë sjellë një vlerësim kaq pozitiv për vendin.
“E para, reforma me thjeshtimin e dhënies së lejeve të ndërtimit.
Raporti thekson se në fushën e lejeve të ndërtimit, Shqipëria ka thjeshtësuar procedurat për marrjen e lejes dhe ka hartuar një rregullore të re për lejet e ndërtimit, duke përmirësuar renditjen në këtë indikator me 83 vende.
E dyta, reforma në marrjen e energjisë dhe shpejtësinë e lidhjes në rrjet.
Në marrjen e energjisë, raporti nënvizon se efiçenca e procesit të marrjes së energjisë është përmirësuar. Raporti evidenton se, koha për marrjen e një lidhje të re energjie u shkurtua me 43 ditë, duke përmirësuar renditjen në këtë indikator me 6 vende.
E treta, reforma në pagesën e taksave.
Pagesa e taksave, sipas raportit “Te bësh biznes” është bërë më e shpejtë dhe e thjeshtë me fillimin e pagesës elektronike të taksave që nga 1 janari 2015. Koha totale e pagesave u shkurtua me 96 orë. Renditja e Shqipërisë në këtë indikator është përmirësuar me 45 vende.
Për të qenë të sinqertë deri në fund, nga të gjithë indikatorët përmes të cilëve Banka Botërore vlerëson ekonomitë, i vetmi vendim i qeverisë Shqiptare që ka patur ndikim negativ në renditjen e Shqipërisë ka qenë ai për të skanuar në mënyrë të detyrueshme në dogana çdo mall që importohet ose eksportohet.
Vendim ky që ndonëse mund të ngadalësojë procedurat e eksport/importit është tejet i rëndësishëm në kushtet e debatit të sotëm për sigurinë e mallrave që importohen në vend, apo të debatit për importin e mbetjeve të riciklueshme.
Përfitoj nga ky rast të falënderoj të gjithë kontribuuesit, si nga institucionet shtetërore, organizatat e biznesit apo partnerët ndërkombëtarë për kontributin e vazhdueshëm në mbështetjen e reformave që sollën këtë përmirësim cilësor në lehtësitë e të bërit biznes dhe mundësuan renditjen e Shqipërisë në pozicionin e 58-të për vitin 2017.”- tha Ekonomi./java/a.k
