Pothuajse 70% e Francës është vendosur nën kufizime të ujit për shkak të thatësirës që po përkeqësohet për shkak të valëve të përsëritura të nxehtësisë që kanë goditur vendin për tre muaj, njoftoi sot qeveria.
Gjithashtu u konfirmua se do të organizojë edhe një takim mbi krizën të mërkurën e ardhshme.
“Ndërsa Franca po kalon një periudhë veçanërisht intensive thatësire, efektet e ndryshimeve klimatike vazhdojnë të rrisin presionin mbi burimet ujore” dhe “pothuajse 70% e territorit francez i nënshtrohet kufizimeve të ujit”, sqaroi Ministria e Tranzicionit Ekologjik.
Më 9 gusht, 99 prefektura, pra i gjithë territori metropolitan francez, ishin të paktën në nivelin e gatishmërisë. Nga këto, 67 prefektura u shpallën në gjendje krize, niveli më i lartë, dhe 21 në gjendje mbikëqyrjeje të shtuar.
Në nivelin e krizës, uji rezervohet për përdorime prioritare: shëndetësi, siguri civile, ujë të pijshëm, higjienë publike.
Në nivelet e gatishmërisë dhe të mbikëqyrjes së shtuar, vendosen kufizime për ujitjen e kopshteve dhe hapësirave të gjelbra, mbushjen e pishinave, larjen e makinave dhe ujitjen e të mbjellave.
Të mërkurën, Ministrja për Tranzicionin Ekologjik, Monique Barbou, pritet të takohet me anëtarët e Komisionit të Parashikimit dhe Monitorimit Hidrologjik (CASH), si dhe me prefektët, për të diskutuar sfidat e thatësirës.
