Nga Ardit Rada
Duket se bllokimi i komisioneve nga PD për zgjedhjen e organeve të Vettingut nuk është i vetmi ngërç që e pengon Reformën në Drejtësi. Dilema të tjera dhe kundërshti që vinë nga brenda qeverisë janë një “shkelm” që po tentojnë ta shtyjnë procesin, këtë radhë institucionalisht.
Dy ministrat Gjosha dhe Vasili më herët kanë shprehur paqartësi mbi rolin e investitorëve të Reformës, Donald Lu dhe Vlahutin. Pas sqarimit për rolin e tyre në bordin e ONM-së, ministri i Drejtësisë nga radhët e LSI ka dërguar një tjetër letër ku formulën dhe përbërjen e quan antikushtetuese.
LSI ka paralajmëruar kështu dërgimin e ligjit në Gjykatën Kushtetuese dhe kjo u bë publike pikërisht 3 ditë para se ONM-ja të publikojë listën e zezë me kandidatët për pozicionet e Vettingut.
Letra e Vasilit është dërguar një ditë para darkës Rama-Meta ku i pranishëm ka qenë edhe Sekretari i Përgjithshëm i Këshillit të Ministrave, Engjëll Agaçi. Roli i këtij të fundit në proces është një pikëpyetje tjetër e ministrit të Drejtësisë. Pra e gjitha shpjegon darkën e 21 shkurtit dhe prezencën e Agaçit në tryezën Rama-Meta.
Megjithëse e paralajmëruar, rezistenca ndaj Vettingut duket se është më e organizuar seç mendohej. Pozicionimin brenda çadrës dhe letrat e dërguar drejt Brukselit janë dy frontet e ‘luftës’ që synojnë shtyrjen e reformimit të gjyqësorit dhe krijimin e institucioneve të reja anti-korrupsion. I habitshëm mbetet fakti sesi një parti si LSI, që betohet për miratimin e reformës, i bashkohet qëllimit të çadrës në një sulm alternativ. Dhe këtu ka një dallim, që e nxjerr Lulzim Bashën “burrë më të ndershëm”. Ndërkohë që LSI e sulmon hapur reformën përmes shkresave që mbarojnë me shenjë pikësimi pyetëse-habitore, Partia Demokratike e justifikon sulmin e saj në emër të protestës për zgjedhjet.
Problemi i dytë që shfaqet ditët e fundit pas iniciativës së Shoqërisë Civile është mungesa e eksponentëve të LSI minimalisht për ta mbështetur peticionin pro-Vetting. Ndërsa një pjesë e deputetëve dhe ministrave të qeverisë kanë dalë publikishit duke firmosur kundër bojkotimit të reformës, një peticion mbarëpopullor po kalohet në heshtje nga partia e Ilir Metës.
Reforma në Drejtësi e pagëzuar nga faktori më i rëndësishëm ndërkombëtar nuk mundet kurrësesi të vihet në diskutim si në formë, ashtu edhe në përmbajtje. Kjo pasi Perëndimi i ka formuluar njëherë e mirë ligjet, bordet, institucionet që do të themelohen dhe funksionimin e tyre.
Sinkroni me Partinë Demokratike kundër reformës, por me argumente të ndryshëm, na jep më shumë se kurrë një panoramë të qartë të një koalicioni në distancë. Dhe më shqetësues madje sesa flirtimet periodike të partisë së dytë në qeveri me dyshen Berisha-Basha. /JAVANEWS
