Koloneli Dilaver Goxhaj deklaroi se Gjykata Speciale “është bërë me këmbënguljen e Serbisë dhe me Parlamentin Evropian, vetëm e vetëm që lufta në Kosovë të quhet luftë civile dhe Kosova t’i kthehet Serbisë”.
“Gjykata i ka shfletuar të gjitha dosjet dhe nuk ka gjetur gjë, e tani na del me pretendimin se është penguar drejtësia. Thuhet se Thaçi mund të dënohet me 6 vite, aq sa është paraburgimi. Kjo gjykatë është bërë me këmbënguljen e Serbisë dhe me Parlamentin Evropian, vetëm e vetëm që lufta në Kosovë të quhet luftë civile dhe Kosova t’i kthehet Serbisë. Për këtë, ata të tre, përveç Rexhepit, e kanë hak të dënohen sepse këmbëngulën që të miratohet kjo gjykatë njëetnike, e njëanshme. Nëse kanë qenë nën presion, të jepnin dorëheqjen”, tha Goxhaj në studion e “Off the Record”.
“Hashim Thaçi thonte: ‘kush nuk e miraton këtë gjykatë, është armik i Kosovës!’. Janë edhe 6 anëtarë të Shtabit të Përgjithshëm atje, që kanë qenë deputetë, dhe e kanë miratuar këtë gjykatë. Nuk u falet! Roli i tyre gjatë luftës ka qenë politik dhe nuk janë marrë kurrë me urdhra. Urdhrat i jepnim ne. UÇK-ja ishte ushtri shumë e organizuar. Ushtria ka piramidë komanduese dhe ata që janë sot në gjyq nuk figurojnë në asnjë rast të kenë dhënë urdhra. Ata kanë dhënë direktiva, por jo urdhra. Ngaqë nuk figurojnë gjëkundi, atëherë po e justifikojnë mbajtjen 6-vjeçare në paraburgim duke thënë se kanë penguar procesin gjyqësor. Do i dënojnë që të mos kenë të drejtë të kthehen në politikë”, shtoi kolonel Dilaver Goxhaj.
