Pas dhunës së regjistruar në përfundim të derbit me Tiranën, Partizani është hedhur në sulm. Nëpërmjet një deklarate për mediat, të kuqtë akuzuan rivalët e qytetit për dështim në përmbushjen e përgjegjësive, ndërsa kërkuan dënimin e bardhebluve, deri në humbjen e ndeshjes në tavolinë.
Tirana si klub organizator ka dështuar në të gjitha drejtimet në përmbushjen e përgjegjësive për organizimin dhe mbarëvajtjen e ndeshjes. Shkeljet e rënda të dokumentuara me foto dhe pamje filmike, si kemi patur mundësi ti shohim të gjithë, meritojnë të dënohen siç e përcakton Kodi i Disiplinës Sportive, Neni 65, deri në humbje të ndeshjes në tavolinë. Klubi Partizani denoncon publikisht dhe zyrtarisht veprimet e dhunshme dhe rrugaçërore të drejtuesve dhe stafit pranë klubit të Tiranës, të cilat janë objekt hetimi sipas legjistacionit Sportiv dhe atij Penal.
Zyra juridike e Partizanit ka nisur menjëherë punën, për të dorëzuar në federatë edhe një kërkesë zyrtare për dënimin e dhunës në stadiumin Selman Stërmasi.
Komisioni i Disiplinës pritet të shprehet rreth ngjarjeve në derbi, ku Tirana rrezikon prej nenit 64, pika c, që sanksionon garantimin e sigurisë së zyrtarëve të ndeshjes, lojtarëve dhe zyrtarëve të klubit kundërshtarë gjatë qëndrimit të tyre kur zhvillohen ndeshje.
Pika ku mbështeten pretendimet e Partizanit, lidhen me nenin 65, për Dështimin në përmbushjen e përgjegjësive nga klubi organizator, fraksion b, sipas të cilës hyrja brenda pjesës së rrethuar të fushës së ndonjë personi, duke shkaktuar akte të dhunës ndaj lojtarëve në fushë dhe ose zyrtarëvetë ndeshjes, dhe/ose ndërprerje të lojës, ekipi përgjegjës për sigurinë në stadium ose ekipi përgjegjës për aktet e kryera do të penalizohet me humbjen e ndeshjes në tavolinë me rezultatin 3-0 si dhe zhvillimin e të paktën 4 ndeshjeve pa spektatorë.
Një pikë e debatueshme në varësi të interpretimit nga Komisioni i Disiplinës. Sepse përveç masave ndëshkimore për personat, zyrtarë apo jo të përfshirë në ngjarje, dhuna ka ndodhur pas përfundimit të ndeshjes. Si zakonisht, derbi vazhdon edhe përtej 90 minutave të fushës. Këtë herë dueli kalon në planin juridik.
Supersport/d.i.
