Personi që shikoni në foto është Valter Osmani, i konsideruar si një nga kokat e trafikut të armëve që u godit një ditë më parë nga sektori i Trafiqeve në Policinë e Tiranës në bashkëpunim me autoritetet kosovare.
Osmani është një nga personat e arrestuar në Kosovë, por pritet që ai të ekstradohet për shkak se provat që e përfshijnë atë në këtë veprimtari kriminale ndodhen në duart e hetuesve të Tiranës.
I arrestuari është banues në zonën e Kombinatit. Policia gjatë kontrollit në banesën e tij gjeti një pjesë të armëve të sekuestruara.
Këto armë dyshohet se në ditët në vijim do të shkëmbeheshin me kokainë.
Burime nga grupi hetimor shprehen se ka dyshime të forta se shtëpia përdorej si bazë për fshehjen e armëve dhe drogës.
Gjatë këtij operacioni janë arrestuar 6 persona në Shqipëri. Euxhenjo Manushi i kapur pak ditë më parë me 1 kg kokainë të pastër së bashku me Klajdi Serjanin rezulton gjithashtu i përfshirë në trafikun e drogës dhe të armëve të zjarrit. Manushit i është komunikuar akuza në qeli.
Në këtë skemë të dyshuar si të përfshirë janë edhe Endri Papa, Aurel Manreka, Gersi Llozha, Kleo Muçalliu dhe Tonin Shkami.
Referuar të njëjtave burime, Valter Osmani si dhe të arrestuarit e tjerë udhëtonin shpesh në Kosovë udhëtime që përdoreshin për të transportuar armët dhe drogën. Sendet e jashtëligjshme shpesh herë transportoheshin me makina private, por edhe me linja autobusi.
Shkëmbimi i armëve me kokainë bëhej nga 25 deri në 30 gram për kokainë të pastër. Ky shkëmbim vlente për pistoletat. Sa i takon shkëmbimit të kokainës me armë të tjera më të sofistikuara, sasi e lëndës narkotike ishte më e madhe.
Armët e zjarrit futeshin kontrabandë nga Turqia dhe më pas niste puna për modifikimin e tyre në një laborator në Kosovë.
