Marklen Haka ishte kthyer nga Spanja, 1 ditë përpara se ndaj tij persona ende të paidentifikuar të lëshonin breshërinë e automatikut.
31-vjeçari ka qenë i pa armatosur dhe sipas burimeve nga grupi hetimit, ai nuk ka arritur të shquaj personat që i kanë gjuajtur pasi autorët kanë qenë të maskuar dhe lëviznin me makinë me xhama të zinj.
Pista kryesore e hetimeve janë e kaluara e Marklen Hakës si dhe implikimi i tij në disa ngjarje të rënda kriminale. Deri në këtë fazë, policia dhe prokuroria kanë marrë në pyetje dhjetra persona, por pa mundur të bien në gjurmët e autorëve, të cilët janë treguar të kujdesshëm, ndonëse lëvizjet e tyre janë fiksuara nga disa kamera sigurie në zonë.
Hetuesit dyshojnë te dëshmia e dhënë nga 31-vjeçari, pasi sipas tyre, disa prej të dhënave janë kontradiktore.
Ky ishte sulmi i dytë me armë ndaj Marklen Hakës. Në 2019 ai i shpëtoi një atentati në derën e shtëpisë, ku u qëllua me 100 plumba dhe humbi jetën halla e tij.
Në Janar të këtij viti 31-vjeçari, i skeduar si pjesë e grupeve kriminale në Nikël, Haka u ndalua nga policia pasi u kap me armë zjarr tip pistoletë, por arresti zgjati shumë pak pasi u lirua më pas nga gjykata.
Ndërsa në vitin 2011 Haka u arrestua si i dyshuar për një vrasje në ish-Bllok, por fitoi lirinë për mungesë të provave.
/a.r
