Atentati ndaj Ilmir Hajdarit, i njohur ndryshe me pseudonimin “Mir Vetlla”, mund të jetë kryer nga vrasës me pagesë.
Në këtë pistë ka përqendruar hetimet Policia e Shkodrës lidhur me ngjarjen e ndodhur të mërkurën në qytetin e Shkodrës. Sipas rindërtimit të ngjarjes, atentatori ka ardhur nga busti i Isa Boletinit në drejtim të lokalit ku ndodhej 42- vjeçari.
Pasi ka ecur në këmbë dhe me maskë në kokë për disa metra derisa i është afruar Hajdarit, i cili ka qenë i kthyer me shpinë, e qëlloi 8 herë me pistoletë. Autori, sipas Policisë, dyshohet se është një vrasës amator, duke u nisur nga mënyra se si e ka kryer krimin, shkruan “Panorama”.
Dëshmitarët kanë deklaruar se teksa ka qëlluar, ka pasur dridhje në duart e tij, duke mos ruajtur qetësinë e një killeri, siç ndodh zakonisht në atentate të tilla për vrasjen e një personi. Atentatori, pasi ka kryer misionin që kishte marrë përsipër, është larguar po në këmbë në drejtim të vendit të quajtur “Ura Dervishbeg”, në Shkodër, që ndodhet jo shumë larg vendit të ngjarjes.
Pas pak metrash ka hipur në një makinë dhe është larguar në drejtim të paditur. Policia ka sekuestruar kamerat e sigurisë që kanë kapur autorin e maskuar, por nuk kanë arritur ende që ta identifikojnë, për shkak të maskës. Gjithashtu nuk është bërë e mundur as identifikimi i automjetit me të cilin atentatori u largua nga vendin i ngjarjes pak çaste pas të shtënave.
Policia vazhdon hetimin për identifikimin dhe kapjen e autorit të plagosjes, por deri më tani nuk kanë arritur që të bien në gjurmët e tij.
Policia ka shoqëruar disa persona të fisit Bajri, pasi në vitin 2001, Ilmir Hajdari është akuzuar se ka marrë pjesë bashkë me dy të tjerë në vrasjen e Indrit Bajrit. Por këta të fundit kanë mohuar të kenë lidhje me ngjarjen, duke theksuar se për vrasjen e 16 viteve më parë e kanë mbyllur konfliktin me Hajdarin. /b.d
