Një futbollist i ekipeve të të rinjve të Afganistanit ishte në mesin e njerëzve që ranë nga aeroplanët që niseshin nga Kabuli, video të tilla dramatike u publikuan nga të gjitha mediat në botë.
Zaki Anwari, 17 vjeç, vinte nga një familje e varfër në Kabul dhe ia kishte arritur të plotësonte ëndërrën e tij për të luajtur për ekipin kombëtar të vendit pa sakrifikuar shkollën.
“Ai ishte i sjellshëm dhe i durueshëm, por si shumë nga të rinjtë tanë, e pa ardhjen e talebanëve si fundin e ëndrrave të tij dhe mundësisë për t’u angazhuar me sport”, deklaroi Aref Peyman, kreu i Komitetit Olimpik Afgan.
“Ai s’kishte asnjë shpresë dhe dëshironte një jetë më të mirë”, tha ai.
Ishte Drejtoria e Përgjithshme e Edukimit Fizik dhe Sporteve të Afganistanit, si dhe Federata Zyrtare e Sportit në vend, ato që konfirmuan ditën e djeshme vdekjen e Anwarit.
“Anwari, si mijëra të rinj afganë, donte të largohej nga vendi, por fatkeqësisht ra nga një aeroplan amerikan dhe vdiq”, shkruajti të enjten drejtoria e sporteve në Facebook, duke u lutur që Zoti ta dërgojë në Parajsë.
Që nga e diela e 15 gushtit, mijëra qytetarë afganë dhe të huaj kanë pushtuar pistat e aeroportit, pas mbërritjes së talebanëve në kryeqytet.
Të hënën, 16 gusht, qindra njerëz pushtuan aeroportin, duke u shtyrë nga forcat amerikane që morën kontrollin për të menaxhuar largimin e diplomatëve dhe personelit ushtarak amerikan dhe aleatëve.
Videot e publikuara në mediat sociale tregojnë disa njerëz që përpiqen të ngjiten në kabinën e avionëve që nisen për fluturim, ndërsa të paktën dy persona bien nga një avion ushtarak që sapo ishte ngritur nga toka./m.j
