Presidenti i Shteteve të Bashkuara, Donald Trump, ka shkarkuar Kristi Noem si Sekretaren e Sigurisë Kombëtare dhe ka emëruar në këtë post senatorin republikan, Markwayne Mullin.
Mullin do të marrë detyrën e re në fund të muajit mars.
Trump falënderoi Noem për punën e saj në krye të institucionit, duke theksuar se ajo “ka shërbyer mirë dhe ka arritur rezultate të shumta dhe spektakolare”. Ai njoftoi se Noem do të kalojë në një rol të ri diplomatik si e dërguar speciale për iniciativën e re të sigurisë të quajtur “The Shield of the Americas”, një projekt që presidenti tha se synon forcimin e bashkëpunimit të sigurisë në hemisferën perëndimore.
Në njoftimin e tij, Trump vlerësoi senatorin Mullin për përfaqësimin e shtetit të Oklahoma dhe e përshkroi atë si një “luftëtar të lëvizjes MAGA”. Presidenti shtoi se Mullin “do të punojë pa u lodhur për të mbajtur të sigurta kufijtë e Shteteve të Bashkuara”.
Kush është Markwayne Mullin
Markwayne Mullin është senator republikan nga Oklahoma që nga viti 2023. Më parë, ai shërbeu për një dekadë në Dhomën e Përfaqësuesve të SHBA-ve.
Biografia e tij zyrtare e përshkruan Mullin si pronar biznesi dhe fermer në sektorin e blegtorisë “cow-calf”.
Ai është i martuar prej 28 vitesh dhe ka gjashtë fëmijë.
Para angazhimit të plotë në politikë, Mullin ka qenë gjithashtu profesionist në sportin e arteve marciale të përziera (MMA).
Karriera e Kristi Noem
Kristi Noem, 54 vjeç, ka drejtuar “United States Department of Homeland Security” që nga fillimi i mandatit të dytë presidencial të Trump në vitin 2025.
Gjatë kohës në detyrë, ajo ka qenë një nga figurat kryesore të politikave të administratës për emigracionin, përfshirë forcimin e kontrollit në kufirin SHBA-Meksikë dhe operacionet për deportimin masiv të emigrantëve pa dokumente.
Mandati i saj është shoqëruar edhe me polemika, mes tyre incidenti në Minnesota ku agjentë federalë qëlluan për vdekje dy qytetarë amerikanë, Alex Pretti dhe Renee Good.
Para se të merrte drejtimin e DHS, Noem ka shërbyer si guvernatore e South Dakota nga viti 2019 deri në vitin 2025.
