Një risi ka shoqëruar ndeshjet e para të këtij kampionati, ajo e mos-prezencës së Policisë së Shtetit në shkallët e stadiumeve.
Klubet organizatore kanë pajtuar polici private për ndeshjet e deritanishme, por derbi është histori tjetër dhe Policia e Shtetit për të shmangur ndonjë incident të mundshëm ka kërkuar informacion lidhur me organizimin e këtij takimi.
Mësohet se në prani edhe të përfaqësuesve të FSHF-së, zyrtarë të policisë i kanë kërkuar Tiranës, si organizatore e takimit, që të ndajë tifozeritë dhe biletat të shiten sipas tribunave përkatëse. Ndryshe ajo nuk ka pranuar të marrë përsipër mbarëvajtjen e këtij takimi.
Gjithsesi, klubi “Tirana” pritet t’i përgjigjet thirrjes së Policisë së Shtetit, që derbi të luhet sipas kalendarit dhe të shkojë sa më normalisht.
Derbi Tirana-Partizani, që hap javën e pestë në Kategorinë Superiore, ora 19:45, të premten në “Selman Stërmasi”.
/b.d
