Të dielën e 25 shtatorit, në orën 17:00, do të luhet derbi i 146-të i kryeqytetit mes Partizanit dhe Tiranës, takim i vlefshëm për javën e katërt të kampionat. Por, në krahasim nga përballjet e tjera mes dy klubeve kryeqytetase, ky derbi do të jetë më i veçanti në historinë e sfidave mes tyre, pasi për herë të parë takimi do të luhet jashtë kryeqytetit.
Derbi i 146-të mes dy kryeqytetasve do të mbahet në stadiumin “Elbasan Arena”. Partizani është pritës i kësaj ndeshjeje, por prishja e stadiumit “Qemal Stafa” i ka lënë pa shtëpi “demat”. Në këto kushte, Partizani ka zgjedhur “Elbasan Arena”-n si stadiumin ku do të presë mysafirët këtë sezon, ku pa dyshim bën pjesë edhe Tirana.
Kryeqyteti ka mbetur me një stadium, “Selman Stërmasi”, i cili administrohet nga Tirana dhe, përveç tyre, si pritës në këtë impiant luan edhe Korabi. Historia e përballjeve mes dy klubeve kryeqytetase ka nisur me fitoren 8-0 të Partizanit në 1947-ën për të ardhur te barazimi 2-2 më 4 maj 2016.
Por kësaj radhe derbi i kryeqytetit do të hyjë në histori, pasi për herë të parë do të luhet jashtë Tirane. Zhvendosja e takimit në Elbasan bën që problematika të shtohet, gjë e cila lidhet me udhëtimin e dy tifozërive, që në derbet e fundit janë shoqëruar edhe me përplasje jashtë stadiumit./panorama/a.k
Nëse në kryeqytet shmangej përplasja mes dy tifozërive gjatë marshimit drejt stadiumit, për vetë pozitën gjeografike, kësaj radhe kërkohet një plan i mirë i detajuar për të evituar konfliktet. Forcat e rendit do të kenë një mision të vështirë për të llogaritur me minutazhe precize itinerarin e udhëtimit të dy tifozërive drejt Elbasanit.
Problem mbetet edhe sigurimi i udhëtimit për tifozët, pasi në mungesë të linjës hekurudhore, kërkohen rreth 100 autobusë për të transportuar ultrasit e dy klubeve drejt Elbasanit.
Stadiumi
“Elbasan Arena” kthehet në identitet për derbin. Tashmë është e konfirmuar për “Panorama Sport” se po vendosen stolat që u hoqën në sfidën midis Partizanit dhe Vllaznisë, në pjesën e ultrasve të të kuqve. Fillimisht u mendua se edhe sektori ku do të qëndronin ultrasit e Tiranës do të hiqeshin, por nuk do të ndodhë kështu. Përgatitjet për vendosjen e ndenjësve të hequra kanë nisur që dje.
“Për derbin, stadiumi ‘Elbasan Arena’ do të jetë i kompletuar dhe nuk bëhet fjalë që të ketë sektorë pa ndenjëset përkatëse. Pra, stadiumi do të kthehet në identitet për derbin dhe për ndeshjet në vazhdim”, u shpreh për “Panorama Sport” drejtori i përgjithshëm i Partizanit, Genc Tomori.
