Deputetja e LDK-së, Vjosa Osmani, duke komentuar deklaratën e kryeministrit Ramush Haradinaj rreth ministrit të Bujqësisë, Nenad Riakllo, ka pyetur se si është e mundur që ende pa u mbushur 24 orë nga raportimet për të kaluarën e ministrit Rikalo, Prokuroria, Policia dhe AKI-ja të deklarohen se ky ministër është i pastër para ligjit. “Kur u hetuan pretendimet? Kur u dëgjuan dëshmitarët?
Kur u gjenden studentët e Deçanit që kishin qenë të maltretuar? A është kjo procedura standarde për secilin rast të maltretimeve e keqtrajtimeve ndaj shqiptarëve (pra injorimi i dëshmive dhe i detyrës zyrtare) apo po veprohet kështu vetëm për shkak se politika ka gisht këtu?”, ka pyetur Osmani, transmeton Koha.net
“Jo rastësisht, me një logjikë të tillë institucionale, asnjë serb që ka kryer krime ndaj shqiptarëve gjatë viteve të 90-ta nuk është dënuar deri tani. Ankohemi se të tjerët po i mohojnë krimet ndaj shqiptareve, por në fakt vet kontribuojmë për një gjë të tillë”, ka thënë tutje Osmani.
E ka cilësuar këtë si të turpshme ndaj viktimave, e të pafalshme për institucionet e Kosovës.
“Më e pakta që do të duhej të ndodhte do të ishte suspendimi i Rikalos deri sa të ketë një hetim të mirëfilltë të rastit. Asnjë institucion i Kosovës nuk duhet të ketë vend për keqtrajtues e paramilitarë. E vërteta nuk mund të fshihet. Ajo del në pah herët a vonë. Vuajtjet e popullit shqiptar të viteve të 90-ta nuk duhet të harrohen kurrë”, ka thënë Osmani.
Kohavisioni mbrëmë ka raportuar me dëshmitë e banorëve të “Dardanisë” së Prishtinës, për maltretimet që u kishte bërë tash ministri i Bujqësisë Rikalo, para luftës në Kosovë. (b.an)
