Deputetja e PS, Klotilda Ferhati ka komentuar tensionet dhe përplasjet në seancën e sotme të Kuvendit, ku deputetët e opozitës kërkuan lirimin e kuksianëve të arrestuar dhe përjashtimin e Ramës nga Kuvendi për shkak të fjalorit të përdorur dy javë më parë.
Deputetët e opozitës hodhën miell, vezë dhe ujë në drejtim të kryeministrit dhe ministrave. E ftuar në rubrikën ‘Opinion’ në News24, Ferhati tha se sjellja e opozitës është një turp sidomos për veprimet e deputeteve femra. Ajo tha se gratë dhe vajzat deputete të PD dhe LSI blenë ujë në lokalin e Kuvendit me urdhër.
“Turp, turp, turp. Një sjellje e padenjë dhe e pahijshme për deputetët. E turpshme sjellja e deputeteve femra në Kuvend. Ne nuk e prisnim këtë sjellje të kësaj opozite. Deputetët e opozitës kërkojnë përjashtimin e Ramës dhe Byroja e Kuvendit e ka marrë këtë vendim duke thënë që është e padrejtë. Vendimi për kuksianët u mor nga gjykata dhe jo nga qeveria.
Në Kuvend u hodh ujë, miell dhe vezë. Uji u ble në bar kafenë e Kuvendit nga gratë dhe vajzat e PD dhe LSI. Kryemadhi i kërkoi Mehmetit që të hedhë ujin në drejtim të kryeministrit. Gratë iu bindën urdhrave të deputetëve burra për të ndërmarrë ato veprime”- tha deputetja e PS.
Ferhati komentoi edhe veprimin e ministrit Ditmir Bushati i cili zbrazi shishen me ujë në drejtim të deputetëve të opozitës.
“Një ministër tregon maturi në momentin që kërkon ndjesë, pasi asnjë nga ne nuk është engjëll. Bushati është një qytetar i denjë i këtij vendi. Por në një moment kur u godit me vezë ai nuk mundi dot të ruajë gjakftohtësinë. Ai kërkoi ndjesë dhe ky është modeli i qytetarit dhe politikanit model”- tha ajo.
ma.me
