Akuzat e këshilltarit të Presidentit Bujar Nishani në drejtim të deputetëve të mazhorancës në Komisionin parlamentar të Sigurisë Kombëtare ka sjellë edhe reagimin e këtyre të fundit.
Në një prononcim për “Dita”, deputeti Arben Çuko e cilëson një turp deklaratën e këshilltarit të Presidentit Pirro Ahmetaj, i cili ndonëse mban uniformën ushtarake ka bërë një deklaratë politike. “Turp për një njeri me uniformën e ushtarakut.
Gjeneral Pirro Ahmetaj! Hiqi spaletat dhe pastaj mund të vjellësh vrer dhe hedhësh baltë mbi Komisionin e Sigurisë Kombëtare.
Ke shkelur rëndë ligjin e depolitizimit. Ke përdhosur keq figurën e ushtarakut. Je kthyer thjesht në një falangist politik.
Duke sulmuar Komisionin e Sigurisë Kombëtare tregove që je thjesht një shërbëtor i tredhur. Helbete, qeni leh aty ku ha”, thekson Çuko.
Më tej, anëtari i Komisionit të Sigurisë i kërkon Shefit të Shtabit që të mbledhë Komisionin e Disiplinës dhe të merren masa ndaj këshilltarit ushtarak të Nishanit.
“I bëj thirrje Shefit të Shtabit të Përgjithshëm të FA të mbledhë urgjent komisionin e disiplinës dhe të marrë në shqyrtim këtë gjeneraluc politik. I bëj thirrje Ministres Kodheli të nxjerrë nga radhët e FA ushtarin e mirë Pirro. Turp, 1000 herë turp për një ushtarak. Hiqi spaletat dhe pastaj shko anëtarësohu te partia e ustait tënd, tashmë pa mustaqe. Mos prit fundin e kohës, e shpejtove vetë” thekson Arben Çuko.
Burime për “Dita” nga Ministria e Mbrojtjes bëjnë të ditur se në vitin 1996, Pirro Ahmetaj është liruar nga detyra nga vetë Ministri i Mbrojtjes në kohën kur Berisha ishte President, Safet Zhulali. Motivacioni lidhej me rezultate të dobëta në punë.
Në atë kohë, dolën edhe disa ushtarakë në lirim të cilët dyshoheshin se kishin lidhje me sigurimin e shtetit, ndonëse zyrtarisht është shkruar në letra për rezultate të dobëta.
