Deputetët serbë në Kuvendin e Kosovës kanë thënë se nuk e kanë votuar Hashim Thaçin për president, por prania e tyre ka mundësuar kuorumin e domosdoshëm, dhe tani agjencia shtetërore ruse e lajmeve “Sputnik” ka shtruar pyetjen çka mund të përfitojnë serbët në shkëmbim për këtë ndihmesë dhënë Thaçit.
Në komentin e botuar në faqen e “Sputnikut”, në gjuhën serbe, me titullin “A ua ka dhënë Thaçi serbëve besën apo fjalën për AKS-në?”, thuhet se me gjithë zgjedhjen e Thaçit, përplasja mes dy rrymave politike shqiptare në Kosovë nuk është ndalur dhe se opozita edhe më tej insiston në zgjedhje të parakohshme dhe heqje dorë nga Marrëveshja për Asociacionin e Komunave Serbe, shkruan “Koha Ditore”.
Dhe “Sputnik” i sheh zgjedhjet e parakohshme në Kosovë si “të pashmangshme… në vjeshtën e hershme, e ndoshta edhe më parë”.
“Deri atëherë serbët e kanë më mirë që të qetësohen dhe të shmangen nga fushëbeteja ‘shqiptaro-shqiptare’, e cila deri tani është vetëm politike”, shkruan Sputnik.
