Gazetari dhe botuesi Nikoll Lesi e sheh me shqetësim situatën politike në vend, teksa shprehet se problemi më i madh i demokracisë është opozita.
Në “Shqipëria Live” në Top Channel me gazetaren Sidorela Gjoni, duke komentuar protestën që Berisha kishte thirrur sot jashtë ambienteve të Kuvendi, ku pjesëmarrës ishin pak veta, Lesi u shpreh se lideri i PD është ai që nuk ngjall besim dhe njerëzit nuk e ndjekin.
“Me gjithë këto zhvillime që kanë ndodhur në qeveri, me SPAK dhe PS, mendova se do ishte një protestë madhështore. As 100 veta nuk ishin. Këto janë pamje që të krijojnë një ndjenjë që kjo opozitë ka mbaruar.
Me këto ngjarje që ndodhën në mazhorancë duhet të kishte protesta me të paktën 100 mijë veta. E kam bindje se problemi më i madh për demokracinë, është opozita. Çfarë frymë, çfarë besimi krijon në popull ky lider (Berisha)? Me këtë lider opozita nuk vjen kurrë në pushtet. Ndaj rri Rama në pushtet. Se me këto që kanë ndodhur, ministër të arrestuar, zv. kryeministër në arrati, zv. Kryeministre në hetim… nuk ka opozitë, nuk ka alternativë, dhe kjo më shqetëson mua si gazetar.
Doktori e ka bërë historinë e vet, mirë apo keq historia e tij ka mbaruar. Për të rrëzuar këtë qeveri, nuk ka një alternativë tjetër”, u shpreh ai.
Ai shton se me gjithë zhvillimet e ndodhur në skenën politike të PS, do duhej që opozita të kishte forcë dhe të shkohej në zgjedhje të parakohshme.
“Edhe sikur Rama të dalë dhe të thotë që shkojmë në zgjedhje të parakohshme, gjë që nuk ndodh, sërish opozita do të humbë”, tha ai.
Sa i përket zgjedhjeve të parakohshme në Tiranë, të cilat u anuluan pas vendimit të Gjykatës Kushtetuese që riktheu Erion Veliajn në detyrë dhe anuloi dekretin e Presidentit, ai tha se edhe nëse do të realizoheshin, PS do ta kishte fituar sërish kryeqytetin.
“Më mirë që nuk u bënë sepse sërish do i fitonte PS. PD duhej të kishte dalë me një kandidat më të fortë”, shtoi ai. Edi Rama thotë Lesi, nuk i ka të kapura të gjitha pushtetet dhe kjo u tregua me vendimin e Kushtetueses për Veliaj, por dhe me marrjen nën hetim nga SPAK të numrit 2 të qeverisë, Belinda Balluku.
“Deri tani flisnim se Rama ka të gjitha pushtetet, edhe unë besoja…. por fakti që Kushtetuesja rrëzoi dekretin, dhe vendimin e Qeverisë, ishte goditje e jashtëzakonshme për Ramën. Pra nuk i ka të gjitha pushtetet. Fakti që SPAK mori në hetim zv. Kryeministren, tregon se nuk e ka SPAK, se ndryshe nuk do ta kishte lejuar”, deklaroi Lesi në Shqipëria Live.
Për Lesin, mes liderit të PS dhe atij të PD ka një marrëveshje nën tavolinë, ku siç thotë ai, “njëri bën sikur qeveris, dhe tjetri bën sikur bën opozitë”.
Nga ana tjetër ai është ndalur edhe te një detaj që ka vërejtur sot në Kuvend, kur thotë se deputetët e opozitës shkojnë në Parlament me makinë 150 mijë euro, e kjo rrjedhimisht ul besimin në publik, sepse njerëzit presin që t’i besojnë dhe t’i ndjekin në rrugën për të rrëzuar qeverinë dhe fituar zgjedhjet.
“Pashë sot deputetë të PD, jo të gjithë, që shkonin me makina 150 mijë euro… cili deputet më bind mua? Demokrati ka 12 vjet në opozitë? Si më bind t’i mua kur shkon me makinë të shtrenjtë?! Ata janë të dy në marrëveshje nën tavolinë, njëri bën sikur qeveris dhe tjetri bën sikur bën opozitë, dhe të dy janë bashkë në një marrëveshje”, shton Lesi.
“Flori është djalë i mirë, artist i shkëlqyer, nuk e di pse i hyri kësaj historie, është çështje e tij. Po ia them sot publikisht që në 2027 PD në zgjidhjet vendore të përgjithshme nuk do ta mbështesë, do gjejë një emër tjetër, një sebep tjetër…”, tha ai duke komentuar kandidaturën e Florjan Binajt për bashkinë e Tiranës dhe aspiratën e tij për të kandiduar kurdo të mbahen zgjedhjet.
